Smitte oppdaga i skisenter i Ål - ber folk som var der tysdag om å melde seg
To personar som har testa positivt for koronaviruset var i Skarslia skisenter i nokre timar tysdag. No prøver kommunen å nå ut til andre som var i anlegget i same tidsrom.
Det er snakk om tysdag 23. februar, mellom klokka 11.00 og 13.30.
– Me ønsker at folk som veit dei var der då tar kontakt med legekontoret, seier kommuneoverlege i Ål, Toril Bøyum.
Artikkelen held fram under annonsen.
Må halde seg i ro
Dei to positive testsvara kom fredag. Då måtte kommunen hive seg rundt, dei sende mellom anna ut SMS til alle innbyggarar om det som hadde skjedd.
– Me vil at folk som var i skisenteret i det tidsrommet skal oppføre seg som de er i karantene. Ta kontakt med oss. Det er usikkert kven som kan tenkast å vere nærkontaktar her, så me treng at folk held seg i ro, seier Bøyum.
Særleg dei som var i kafeen bør vere merksame og melde seg.
Det er førebels ikkje sett nokon i karantene som følgje av dei ferske smittetilfella. Dei skal ha få nærkontaktar utover det som mogleg kan ha skjedd i Skarslia.
Ski- og akeanlegget i Skarslia held for øvrig opent som vanleg.
Alle blir testa
Det er rekna at det er snakk om det muterte viruset i dette tilfellet. Det har samband med kor dei to kan ha plukka opp smitte. Det har skjedd i eit område med kjent mutert virus.
Alle som melder seg som har vore i skisenteret i desse timane tysdag, vil bli testa.
Tilfella i Ål er langt frå dei første smittetilfella i Hallingdal denne veka. Også Hol, Nesbyen, Hemsedal og Gol har fått positive prøver på bordet. Det har kommunane vore budd på i desse vinterferievekene.
Artikkelen held fram under annonsen.
– Me har tatt høgde for at dette kunne skje, seier Bøyum.
