Gode nyheiter i Hol: - Me har ein meir kontrollert situasjon

Smitta som no er avdekt i Gol strekker seg også til Hol. Kommunen venta onsdag ettermiddag i spenning på eit prøvesvar som potensielt kunne gi større konsekvensar. Testen viste seg å vere negativ.

– Me har ein person som er nærkontakt til eit smittetilfelle, sa kommuneoverlege Silje Marie Koldal til Hallingdølen ved 15-tida onsdag.

Nærkontakten det er snakk er testa både med hurtigtest og ordinær prøve. Begge viste seg negative.

Som Hallingdølen tidlegare har skrive, er NTG Geilo råka av situasjonen i Gol. Ifølgje kommuneoverlegen er ikkje skulen sett i formell karantene, men elevane har heimeskule i påvente av fleire svar.

– Ved NTG er det tett mellom kull og idrettar, så me har vald å ha eit raudt nivå, fortel Koldal.

Med den negative prøva har NTG fått eit pusterom.

– Men heile karantenetida må nok gjennomførast før dette blir rekna som avklart. Det vil bli heimeskule til karantenetida for nærkontakten er over, seier Koldal.

Det vil bli noko testing i Hol torsdag også. Det har dukka opp fleire forgreiningar til smittetilfella som no er avdekt i Gol.

– Det er snakk om fire nærkontaktar som me kjem til å teste i morgon, seier Koldal.

Men trass i dette:

– Me har no ein meir avklart situasjon. Me har også fått avgrensa alle desse nærkontaktane med karantene og ventekarantene. Eg er optimistisk, seier kommuneoverlegen.