Ber folk halde seg heime og foreslår strenge lokale tiltak: Sjå heile lista her
Statsminister Erna Solberg ber no alle om å halde seg mest mogleg heime. I tillegg legg regjeringa fram ei liste med tiltak som dei anbefaler innført lokalt.
– Mitt hovudbodskap i dag er at nordmenn dei neste vekene må halde seg heime, og avgrense kontakten med andre menneske, sa statsminister Erna Solberg i Stortinget torsdag formiddag.
– Situasjonen er svært alvorleg. Om utviklinga fortset på same måte, kan me oppleve det same som stadig fleire europeiske land gjer no. Frykta er at helsevesenet kollapsar.
Artikkelen held fram under annonsen.
Med bakgrunn i dette har regjeringa kome med nye nasjonale tiltak i dag. VG har gjengitt lista:
* Alle må i størst mogleg grad halde seg heime.
* Me bør halde minst to meter avstand til personar i risikogrupper.
* Maks 20 personar på private arrangement, og 50 på innandørs arrangement.
* Unødvendige innanlandsreiser bør unngåast.
* Nasjonal skjenkestopp klokka 24.
* Krav om attest på gjennomført test blir innført for alle som kjem frå raude land.
* Personar som kjem til landet utan å ha fast bustad eller arbeidsgjevar må opphalde seg på koronahotell og teste seg i ein periode på inntil ti dagar.
Artikkelen held fram under annonsen.
VG presenterer også ei liste over lokale tiltak som kan vere aktuelt for regjeringa å vurdere for delar av landet der smitta strekker seg utover kommunegrensene. Om desse tiltaka bør bli vedtatt på lokalt eller nasjonalt nivå avheng ifølgje regjeringa av hastegraden.
Her er lista over anbefalingar til lokale tiltak:
* Raudt nivå for vidaregåande skular.
* Full stenging av treningssenter, idrettshallar, svømmehallar, bibliotek, stader for arrangement der det ikkje er fastmonterte sete og offentlege stader der mange møtast innandørs.
* Skjenkestopp på serveringsstader tidlegare enn nasjonalt.
* Sterkare gjennomføring av obligatorisk heimekontor for dei som kan.
* Sterkare oppmoding om å unngå kollektivtrafikk.
* Innføre råd om munnbind for sjåfør og passasjerar i taxiar i dei områda som har dette rådet i kollektivtransporten.
Artikkelen held fram under annonsen.
* Gjenta at desse områda bør stoppe trening i breiddeidretten for vaksne, slik det er gjort i Oslo.
* Arrangement: Revidere lokale reglar opp mot nytt nasjonalt regelverk, og vurdere ytterlegare innstrammingar - eventuell forbod mot arrangement. I område med utbrot blir dei neste 14-30 dagane vurdert som særleg viktig for å redusere sosial omgang og risiko for smittespreiing.
* Serveringsstader: Understreke moglegheitene for innstramming i skjenking utover det nasjonale nivået. Auke anbefalinga for avstand til to meter i område med utbrot.
* Full prioritering og mobilisering av kommunane sin kapasitet for testing og smittesporing, eventuelt med bistand frå andre kommunar og andre delar av landet.
Fredag formiddag skal kommuneoverlegane i Hallingdal ha eit møte for å diskutere korleis tiltaka i regionen skal sjå ut vidare. Deretter blir det opp til kvar enkelt kommune å avgjere kva som skal gjelde lokalt.
