Skaut vekk gullet: - Fytti katta, det var ræva

Norge, med Vetle Sjåstad Christiansen på ankeretappen, tok laurdag sølv i stafetten under VM i skiskyting. Geilingen skaut vekk gullet heilt på tampen.

Det starta på verst tenkjelege vis under herrestafetten i VM i skiskyting i Nove Mesto i Tsjekkia laurdag ettermiddag. Norge, med Vetle Sjåstad Christiansen frå Geilo på laget, veksla heile 45 sekund bak teten etter fyrste etappe. Men herifrå gjekk det betre og betre. Vetle Sjåstad Christiansen gjekk smilande ut på siste etappe, men avslutninga skulle vise seg å bli vanskeleg.

Det norske laget bestod av Sturla Holm Lægreid på fyrsteetappe, Tarjei Bø på andre, Johannes Thingnes Bø på tredje og til slutt Vetle Sjåstad Christiansen på ankeretappen.

– Fytti katta, det var ræva. Heilsprekk, i dag skal eg ta på meg syndebukkstempelet. Det var tydeleg, sa Vetle Sjåstad Christiansen til TV2 etter målgang. Han meiner sjølv at det at han følte seg så sprek laurdag gjorde at han gjekk for hardt ut. Trass i ein stor skuffelse over at gullet i lomma glapp, tok Christiansen andreplassen med fatning og møtte pressa ganske umiddelbart etter løpet.

Sturla Holm Lægreid på fyrsteetappen tok også sin del av ansvaret for at Norge ikkje tok gull på stafetten: – Me har vore storfavorittar og gullet var målet i dag. Eg var misfornøgd med min etappe, sa Lægreid til Tv2 etter at sølvet var eit faktum.

– Me bør vinne denne stafetten, me gjer ikkje det. Men me må vera med på både oppturar og nedturar, sa ekspertkommentator Ole Einar Bjørndalen i Tv2 si VM-sending. Han legg til at dessverre har det blitt slik i Norge at berre gull er godt nok.

Heldigvis såg Vetle Sjåstad Christiansen ut til å ta nedturen med fatning: – Dei er eit godt team, og dei står godt saman, men det blir ei krevjande natt for Vetle, meinte Bjørndalen.

Sturla Holm Lægreid opna stafetten med fullt hus, men måtte bruke eitt ekstraskot. Andre skyting baud på ein strafferunde for Lægreid og Norge veksla som nummer tolv, 45 sekund bak.

Tarjei Bø skaut to fulle hos, men måtte ty til to ekstraskot på andre skyting. Han tok Norge opp i leiing og veksla fyrst av alle.

Dermed var det klart for Johannes Thingnes Bø. Han skaut fullt hus på fyrste skyting, men brukte to ekstraskot. På andre skyting vart det treff på fyrste forsøk på alle fem blinkane, og Bø gjekk fyrst ut frå standplass. Norge veksla dermed aller fyrst før sisteetappen, og alt stod og fall på Vetle Sjåstad Christiansen frå Geilo.

Christiansen hadde nok sett for seg scenariet. Til fyrste skyting kom han i einsam majestet inn på standplass. Iskaldt skaut han ned alle blinkane utan å måtte ty til ekstraskot, og imponerte både sportskommentatorar og tilskodarar. Svensken som kom bak bomma to gonger, men henta seg inn med to ekstraskot. Frankrike og Tyskland kom rett bak. Til andre skyting kom geilingen inn med grepet om gullet, men det vart trøbbel. Heile tre strafferundar, og 450 meter ekstra, måtte Christiansen ut på. Svensken skaut ned alle blinkane, og kunne ta sigeren på forskot. Tredjeplassen gjekk til Frankrike etter at Vetle Sjåstad Christiansen spurta forbi og sikra sølvet.

Laurdagen vart ikkje den håpa oppturen for Vetle Sjåstad Christiansen etter ein laber dag tidlegare i veka. Etter to løp og to bronsemedaljar frå start i VM, måtte Christiansen onsdag sjå premieseremonien frå sidelinja. Då vart han til slutt nummer 16 på 20 kilometeren.

VM blir avslutta med fellesstart sundag.