Bogar tok NM-gull

Stian Bogar vann favorittøvinga 60 skot liggjande og tok fire medaljar under NM på Elverum.

Skyting: – Det var veldig moro å vinne. Det vart eit plaster på såret for OL-kvaliken, sa Stian Bogar på telefon frå Elverum før premieutdelinga.

Revansje i NM

Marginane har ikkje vore heilt på Bogar si side i vår. I verdscupen i prøve-OL i London var Stian to tidelar frå sølv og ein tidel frå bronse. I forrige veke tapte han omskytinga mot Odd Arne Brekne om OL-plass på 60 liggjande med eit fattig tidels poeng.

På Elverum var derimot Bogar i storslag. På 60 ligg skaut han 596 poeng, 44 av dei innertiarar i hovudskytinga. Han inntok leiinga to innertiarar føre Ole Magnus Bakken, som er OL-klar i denne disiplinen.

I finaleomgangen vart det nervepirrande jamt. Stian Bogar låg ein tidel bak leiaren før siste skot, og mange lurte nok på om resultatet frå OL-kvalifiseringa skulle gjenta seg. Men Bogar ville det annleis. Med eit 10,7-skot (av 10,9 mogelege poeng) avslutta han solid og sikra seg NM-gullet.

To sølv og bronse

Stian Bogar fekk til saman fire medaljar under NM på Elverum. På heilmatch (40 skot i kvar stilling) vart han nummer tre med 1.173 poeng.

I halvmatch (20 skot i kvar stilling) vart han nummer to med 582 poeng. Kim Andre Lund vann med 584.

Andreplass vart det også til høværingen i utvida heilmatch. Stian Bogar fekk 1170 poeng som var tre poeng mindre enn gullvinnar Ole Kr. Bryhn. Ettersom Stian berre har skote liggjande dei to siste månadene, var det opplyftande skyting på kne og ståande. Bogar viste at han blir blant favorittane under Landsskyttarstemnet på Voss i august.