Vart takka for viktige bidrag

Kommuneoverlege i Ål Øystein Lappegard har vore ei avgjerande brikke for utbygginga av Hallingdal sjukestugu.

– Sjukestugu er eit fyrtårn i norsk helsevesen. Hallingane har fått eit tilbod me elles ikkje ville fått, sa regionsrådsordførar Oddvar Grøthe før helga under opinga av den nye sjukestugu. Han trekte fram enkeltpersonar som har vore sentrale i å gjere utbygginga mogeleg: Øystein Lappegard (kommuneoverlege i Ål), Oddmund Nestegard (avdelingsleiar intermediær avdeling), Trond Kleppen og Reidar Aasheim (prosjektleiarar for Hallingdal lokalmedisinske tenester), Per Bleikelia (sjukehusdirektør ved Ringerike sjukehus) og Ingeborg Rinnaas (avdelingsleiar for Hallingdal sjukestugu) har alle bidrege.

Spesielt trekte han fram Lappegard, som har vore prosjektleiar sidan 2008 og gjennom det vore ein pådrivar. Han har til og med skrive ei doktoravhandling med Hallingdal sjukestugu som tema.

– Du har gjort eit stort arbeid og du er ein lege med eit folkeleg språk og tolmod til å vente på politiske miljø, sa Grøthe. Som takk for innsatsen vart Lappegard tildelt eit fotografi av Terje Bjørnsen. Motivet er frå ei trapp i Hallingskarvet. Symbolikken var at Lappegard har vist vegen fram for andre, trinn for trinn.

Grøthe har sjølv hatt plass i styret i Vestre Viken HF i fire år og hans erfaring med saka var at 2012 var eit særleg krevjande år.

– Då var ein komen til konkretisering. Det mest krevjande var kostnadsfordelinga kommunane i mellom, seier Grøthe. Det var då tale om å skape forståing for behovet for dei ti interkommunale sengene.

– Lappegard var sentral og ein slags brubyggjar i denne prosessen, la Grøthe til.