Tilbake att på Geilo
I løpet av hausten er Geilo Auto tilbake som forhandlar for bilmerket Mazda.
Det er mange år sidan det japanske bilmerket har hatt nybilforretning i Hallingdal. I dag må hallingane reise til Voss eller Roa for å koma til næraste Mazda-forhandlar.
Tradisjon
No er det ikkje lenge før Geilo Auto er tilbake som Mazda-forhandlar. Det er eit bilmerke som har lange tradisjonar på Geilo og i familien Fossgård.
Artikkelen held fram under annonsen.
– Mazda er eit bilmerke som er godt innarbeidd og har lange tradisjonar i vårt område. Men det er over 20 år sidan far min slutta som Mazda-forhandlar på Geilo Auto. Det var moro å få agenturet, seier dagleg leiar Erik Fossgård.
Breitt spekter
Geilo Auto er einaste bilforretninga på Geilo. I tillegg til bruktbilavdeling har Geilo Auto agentur på den koreanske bilen Ssong Yong.
– Me driv bilberging, bensinstasjon, bilverkstad og bruktbilavdeling. Å bli nybilforhandlar av Mazda og få ei reindyrka nybilforretning gjer at me får eit breitt spekter, seier Fossgård.
Pussar opp
Det går framleis nokre månader før det rullar nye Mazda-bilar inn i forretningslokala til Geilo Auto.
– Me skal pusse opp lokala i andre etasje i haust og laga Mazda-butikk der. Me opnar i november, seier Erik Fossgård.