Slutt for gutar på jobb i barnehagen - kuttar ein god ressurs
Viken har fjerna pengestøtta til prosjektet Menn i barnehage (MIB).
Det betyr at det er slutt på å få inn gutar frå ungdomsskulen som leikeressurs i barnehagane.
Satsar på utdanning
– Fylkesmannen i Viken satsar no midlar på å få opp kompetansen for barnehagelærarar på grunn av den nye pedagognorma som trådde i kraft 1. august 2018, seier Karin Heiene på oppvekstkontoret i Ål kommune.
Artikkelen held fram under annonsen.
Ordninga med leikeressurs har for Hallingdal vore praktisert sidan barnehageåret 2013/2014 og fram til og med 2018/2019 gjennom midlar frå Fylkesmannen i Buskerud. Dette er midlar som har gått til likestillingsarbeid og fremme rekruttering av mannlege barnehagelærarar. Alle barnehagar med mannlege tilsette har hatt mogelegheit til å søkje om midlane.
Skuffande
No vurderer MIB Hallingdal nye tiltak.
– Det er ikkje noko som er planlagt, men MIB Hallingdal har eit stort ynskje om at leikeressursane skal fortsette, seier styrar i Sando barnehage, Bernt-Ivar Hjelmsø.
I Ål har Sando barnehage, Torpo barnehage og Sundre barnehage vore med i prosjektet med dei mannlege tilsette som rettleiar.
– Det har fungert kjempebra, seier Hjelmsø. Han fortel at ungane alltid gler seg til å leike med gutane frå ungdomsskulen. Det kunne vera aktivitetar som teikning, måling, bygging av lego, musikkstund, uteaktivitetar eller lesing.
– Ungdommane har fått lønn, og dei har fått eit anna inntrykk av korleis det er å jobbe i ein barnehage, fortel Hjelmsø. Han seier det kjem til å bli eit sakn utan ungdommane.
Rekrutteringsprosjekt
Leikeressursen har vore retta mot gutar i 9.-trinn på ungdomsskulen. Med ressursar frå fylkesmannen har det vore mogeleg å gje gutane løn. For å lære korleis ein søknad og tilsettingsprosess føregår, har elevane skrive søknad med referanse og det har vore intervju/samtale med aktuelle kandidatar.
– Dei har fått ein smak på yrkeslivet, seier Hjelmsø som meiner det er viktig å begynne tidleg.
Artikkelen held fram under annonsen.
Viktig prosjekt
Håpet er at nokon av ungdommane kjem att i ordinære stillingar i barnehagar seinare. Slik sett var prosjektet også eit rekrutteringsprosjekt av menn i barnehage.
– Me meiner det er viktig å vidareføre tilbodet, sidan det er eit rekrutteringstiltak for å få menn til å søke seg til barnehageyrket, seier Hjelmsø. Barnehagar i alle kommunane i Hallingdal har vore med i prosjektet så lenge det har vore mannlege tilsette.