Skandalar, campus og politibråk - sjå bileta frå russerevyen her!
Hallingrussen har utvilsamt følgd med på nyheitene. Årets revy tek eit innhaldsrikt skuleår på kornet.
Onsdag føremiddag hadde russekullet generalprøve for medelevar og lærarar ved Gol vidaregåande skule. Sistnemnde lo kanskje høgast, noko som vitnar om god sjølvironi frå deira side. For dei får køyrd seg litt, tradisjonen tru.
Sjå stor biletserie her:
Artikkelen held fram under annonsen.
Bilete 1 av 13
Rektor «Anita Antoinette», her spelt av Michaela Skalníková, blir jaga då det bryt ut revolusjon på skulen. Ho har servert kake til lærarane medan elevane svelt på grunn av stengd kantine.Bilete 2 av 13
I januar stengde skuleleiinga ved Gol vgs kantina for å gje elevane ei lærepenge på grunn av rot og søl. Det skapte reaksjonar, og vart trekt fram i revyen.Bilete 3 av 13
Anton Glushchenko drog ei rekke «dad jokes», eller «pappa-vitsar» frå scena.Bilete 4 av 13
Ingrid Marie Dokken gjorde god figur som ordførar i Ål, Soveig Vestenfor. Her leiar ho eit regionrådsmøte der ungdommen tryglar om å få sleppe til.Bilete 5 av 13
Fleire godt koreograferte dansenummer krydra årets russerevy.Bilete 6 av 13
Revysjef Maximillian Thomas Martinsen gav alt både bak og på scena.Bilete 7 av 13
Ulrik Alexander Ytteborg spelte «byguten» som skulle bli med til svigers i Hallingdal for første gong. Det vart ei kaotisk oppleving.Bilete 8 av 13
Odin Tobias Bolstad spelar ein altfor ivrig gymlærar med altfor trong shorts.Bilete 9 av 13
Nervar og spenning før generalprøven.Bilete 10 av 13
Tora Walle spelar ein frustrert hytteeigar som dreg til Gol på dagtid for å boikotte næringslivet i Nesbyen på grunn av løypestriden.Bilete 11 av 13
Jentene serverte eit passe frekt og passe tøysete dansenummer.Bilete 12 av 13
Russepresident Ida Marie Nerheim spelar «sjeiken» som overtyder Hallingdølen om at ekskludering og press ikkje er eit problem for Hallingrussen. Eit snev av ironi kan sporast her.Bilete 13 av 13
Gutane måtte tradisjonen tru kaste skjorta under russerevyen.Høgaktuelt og lokalt
Det er ingen tvil om at Hallingrussen har følgd med i nyheitsbiletet det siste året. Sketsjane er både høgaktuelle, relevante og ikkje minst dønn lokale. Spissar ein øyra og får med seg dei små replikkane, er det tydeleg at russen vil bli tatt på alvor. Dei følgjer med på kva som skjer.
Årets russekull tek for seg alt frå bu- og blilyst-tiltak, kollektivtilbodet, lokalval, Campus Hallingdal og ein ny fylkeskommune som er blakk som ei kyrkjerotte. Det er forfriskande å sjå dei samfunnsaktuelle tema gjennom ungdommen sine briller og med ein god dose humor.
Me får mellom anna møte journalisten Knut Dølen som har fått nyss i ei rekke politikarskandalar på toppnivå i Hallingdal. Det strekker seg frå aksjehandel til falske yrkestitlar og nasking frå matbutikken.
Mykje å velje i
Revyen har plukka opp alt frå dialektdød til knotete legevaktsamarbeid. Dei rettar eit spark mot innflyttarar utan respekt for «halling-identiteten», og mot politiet som kvir seg for å ta grep når det er bråk i frykt for papirarbeidet som følgjer. På finurleg vis har elevane klart å flette saman nasjonale skandalar med lokale tema, og ikkje minst ein karakter eller to dei fleste vil kunne dra kjensel på.
– Det er veldig bevisst. Me ønsker ikkje at ting skal vere for internt, men at det skal vere artig og inkludere heile demografien i Hallingdal, seier Maximilian Thomas Martinsen og Andrea S. Bergtun.
– Har de hatt godt materiale å velje i?
– Veldig, ler begge to.
– Me sleit ikkje med å kome på ting, men har heller måtte kutte, seier dei om året som har gått.
Artikkelen held fram under annonsen.
Profesjonell hjelp
Bergtun og Martinsen fortel at billettsalet har gått bra så langt. Premieren går av stabelen onsdag kveld. Undervegs i prosessen har dei også fått hjelp av Buskerud Teater.
– Me har hatt ein teaterrådgjevar som har hjelpt oss med å lage ein revy som har preg av både det lokale, humoristiske og musikalske. Alt av tekst, song og dansar er laga av oss, men hjelpa med regien har vore kjempenyttig, seier revysjef Maximilian Thomas Martinsen.
Kanskje har det også bidrege til at årets russerevy har ein klar og raud tråd gjennom heile framsyninga. Og tittelen på årets russerevy, «Make Hallingdal Great Again», passar godt til å samanfatte året som har gått. Noko er kanskje på veg til å bli «great» her oppe, og andre ting må det verkeleg jobbast hardt med.
