Lanserer sjølvbetent jobbportal

Hallingdølen og Karriere.no samarbeider om ny sjølvbetent portal for ledige stillingar. - Me vil gjera ting enklare for kundane, kort og godt.

Hallingdølen har revitalisert sidene for stillingsannonsar, slik at du kan ordne alt på ein plass.

– Me ser spesielt at yngre bedriftseigarar er vane med å finne ting på nett når dei har tid. Det ligg ei forventing om å få ordna det meste på nett. Me tilpassar oss den endringa i marknaden, seier Espen Forsberg, sals- og marknadssjef i Hallingdølen.

Når enda lenger

Samarbeidet bygger på eksisterande teknologi og løysingar hos Karriere.no, som no er tilpassa Hallingdølen.

Alt før lanseringa av jobbportalen såg Hallingdølen at nær halvparten av visningane på stillingsannonsar skjer utanfor dalen. Samarbeidet med Karriere.no vil gjere at stillingsannonsane blir endå meir synlege, då dei blir lagt ut på begge nettstadene.

– Me ser ein jamn auke i annonsemarknaden. Vårt bidrag er den tekniske løysinga, samstundes som me promoterer vår portal. Det gir også lokalavisene ei bra løysing pluss annonsering nasjonalt, seier Endre Berge, dagleg leiar i Karriere.no

Vise det som finst

Karriere.no har sidan 2012 jobba for å hjelpe ulike plassar med å vise fram ein stor og spennande jobbmarknad. Då spesielt i samarbeid med lokalaviser. I 2017 gjekk dei bort frå samarbeid med Amedia for å stå på eigne bein.

– Etter over 1000 besøk rundt i ulike bedrifter er beskjeden klar: Bedrifter har behov for kompetanse og folk. Det skjer så mykje rundt om i landet som ingen ser eller ikkje kjem fram. Mange arbeidsplassar blir heller ikkje lyst ut. Då er lokalavisa ein perfekt plass å vise seg fram. Samstundes bidreg Karriere.no slik at stillingsutlysingane når folk i heile landet, seier Berge.

– Stillingsportalen me har fått på plass er kanskje også noko fleire lokalaviser ønskjer same løysing på sikt. Dette er ein start på noko me trur kan bli bra, seier Forsberg.

Når du vil

Gjennom nettbutikken kan du no sjølv registrere bedrifta, legge ut stillingsannonsar og kjøpe den synlegheita du vil. Kundane kan velje mellom ulike modular til fast pris, noko som skal gjera det enkelt for kunden når som helst på døgnet. I tillegg til annonsering på nett og papir i Hallingdølen og på Karriere.no, kan du også bestille annonsering på jobbihallingdal.no, finn.no og arbeidsplassen.no (NAV).

– På den måten blir me meir tilgjengelege. Men me vil framleis prate med kundane. Så det er berre å ta kontakt om du ønskjer noko anna enn standard format, seier Forsberg.

Vinn-vinn

Stillingsportalen føyer seg også inn i rekka med innovasjonsprosjekt i Hallingdølen, som til dømes Tipps-appen. Men det blir også jobba med å utvide jobbportalløysinga til å omfatte fleire annonseprodukt både digitalt og på papir.

– Det er ikkje slik at folk kjem til dalen berre for naturen og utsikta, dei treng jobb. Målet for både Hallingdølen og Karriere.no er å visa fram så mange bedrifter og jobbmoglegheiter som råd. Det er ein viktig del av samfunnsoppdraget. Men då er det også viktig at næringslivet tek vare på lokalavisa. Det er ikkje slik at folk går inn i ein tom butikk. Det er først når du har varene at folk kjem. Det same gjeld bedrifter. Dei må kjenne si besøkingstid og vise seg fram. Det vil gagne alle, seier Berge.

Berge lovar også at fleire spennande ting er på gang, som kjem etter kvart. Ikkje minst at bedriftene i dalen skal få eit godt tilbod for å syne fram kva som finst av jobbar.