I desse dagar er alle kommunane i Hallingdal i gang med koronavaksinering. Dette er eit illustrasjonsbilete frå vaksinering mot svineinfluensa for nokon år sidan. Foto: Sigmund Krøvel-Velle

Ein ny smitta i Hol - i dag vart dei første 18 vaksinane sett

Hol er no oppe i 25 smitta sidan 18. desember. Men i dag vart endeleg dei første edle vaksinedropane delt ut i kommunen.

Dei er etterlengta i Hol, som gjennom fleire rundar i 2020 fekk ei stri tørn med koronaviruset. Ikkje minst i mars, då kommunen i ein periode var den hardast råka i heile landet.

To utbrot

Også dei siste vekene har det vore meir enn nok å gjere innan helsesektoren i Hol. Rett før jul fekk dei eit utbrot som gav 13 smitta. I romjula følgde eit nytt.

Tysdag melder ordførar Petter Rukke om nok ein smitta. Talet på smitta sidan 18. desember er no oppe i 25.

– Den positive testen i dag var venta og er under kontroll. Det er kontroll på nærkontaktar, seier han.

Endeleg i gang

Kommune-Norge har venta lenge på å endeleg få tak i vaksine mot koronaviruset. I desse dagar startar endeleg vaksineringa landet rundt, og tidlegare i dag kunne Hallingdølen fortelje om Agnes i Nesbyen som fekk den etterlengta sprøyta i dag.

Også i Hol vart dei første dropane av vaksinen delt ut tysdag. Det skjedde ifølgje ordførar Rukke på Geilotun. I løpet av dei kommande dagane er alle kommunar i Hallingdal i gang med den første runden med vaksinering.

Det vil likevel ta noko tid å kome skikkeleg i gang - i fyrste omgang er det berre nokre få dosar som har blitt delt ut til kvar kommune. Men det er likevel venta at leveransane no vil kome på løpande band.

Les også
Sprøytestikk for historiebøkene
Les også
43 smitta gjennom jul og nyttår: – Me skal følgje godt med dei neste to vekene
Les også
Ny person koronasmitta i Gol: – Det er innreisesmitte