Sviande nederlag nummer to - men det er nok no!

Når ein steinhøgg ein gong, er det sjeldan lurt å prøve ein gong til.

Det er det regjeringa no har gjort, med same resultat. Ap og Sp blir instruert av eit fleirtal på Stortinget som seier nei til å splitte fellesprosjektet Ringeriksbane og ny E16 mellom Skaret og Hønefoss.

Regjeringa prøvde fyrst hausten 2022, men måtte gi seg i budsjettforhandlingane med SV. Men i staden for å legge avtalen med SV til grunn, prøvde dei seg med eit hakket frekkare grep i forslaget sitt til Nasjonal transportplan. No skulle den ferdig planlagde Ringeriksbanen ut av heile planen, mens ein ville kome i gang berre med ny veg.

Men også vegsatsinga var tynn. Regjeringa kunne ikkje svare på om vegbygginga kunne starte med eksisterande reguleringsplan, og såg heller ingen grunn til å finne ut av det før Stortinget behandla saka.

Slikt er lite imponerande handverk.

For Ap og Sp er det som skjedde i Stortinget onsdag eit stort nederlag. Regjeringa satsa høgt på ikkje å realisere Ringeriksbanen, sjølv om prosjektet er ferdig utgreidd og prioritert av fagetatane. Alt i Hurdalsplattforma la dei grunnlaget for det dei i ettertid har levd opp til. Der skriv regjeringa nemleg at dei vil oppretthalde ambisjonane om InterCity-utbygginga på Austlandet som Stortinget vedtok i 2013. På dette tidspunktet var ikkje Ringeriksbanen ein del av Inter City, det kom seinare.

Regjeringa har altså ikkje villa jobbe for ein firearma Inter City, med Ringeriksbanen. I staden reverserte dei til Inter City anno 2013, altså ei satsing utan Ringeriksbanen.

Det er dette dei har styrt etter. Ikkje tidlegare lovnader og valkamp-garantiar om rask oppstart av Ringeriksbanen.

Men fleirtalet på Stortinget ville det annleis. Vedtaket frå ein samla opposisjon minus MDG er eit så sterkt signal at ei regjering - anten med Ap/Sp eller borgarlege parti - ikkje kan trenere Ringeriksbanen lenger.

Regjeringa seier i kommentarane sine at opposisjonen er uansvarleg når dei legg Ringeriksbanen og andre prosjekt inn i NTP utan å ha finansieringa klar. Det kan ein godt meine. Det står likevel att å forhandle fram detaljar i transportplanen inntil innstillinga kjem frå transportkomiteen 12. juni og endeleg behandling 19. juni.

Regjeringa hadde råd til 13 milliardar til veg mot Hønefoss. Med dei pengane kjem ein i gang med Ringeriksporteføljen. Så går det for eksempel an å omdisponere 23 milliardar frå dobbeltspor til Fredrikstad, eit prosjekt som ikkje ein gong er utgreidd.

Då er ein ikkje langt unna å ha finansiert satsinga på det aller viktigaste tiltaket for ein ny og framtidsretta Bergensbane.

Stortinget har for andre gong - og tydelegare enn nokon gong før - slått fast at Ringeriksbanen skal byggast. Det må ei regjering forhalde seg til.

For Ap og Sp må det vera langt smartare enn å steinhogge ein tredje gong.