Vann FIS-opninga

Tidlegare NTG-elev Kjetil Hvammen vann sesongens fyrste FIS-renn på Geilo.

Alpint: Hvammen gjekk på alpintlina på NTG-Geilo og er også halvt geiling.

I slalåmrennet laurdag var han høgt oppe etter fyrste omgang, og med ei sterk tid i andre omgang sikra han sigeren. Franske Maxime Tissot var nærast Hvammen. Han hadde eitt hundredels sekund å gå på etter fyrsteomgang, men måtte gi tapt i andre omgang. Til slutt var han sju tidelar bak på andreplass. Sundag vart Kjetil Hvammen nummer tre. Då var han 35 hundredelar bak eitt år eldre Max Røisland, som vann.

Uheldige

Bjørn Brudevoll var høgst oppe av dei andre hallingane. Den tidlegare bærumsalpinisten køyrer for Hemsedal og er elev på NTG-Geilo.

Han vart nummer 14, med tredje beste tid av 17-åringane. Hemsedølene Tomas Markegård og Oskar Rosberg Vøllo køyrde ut i andre omgang. Vøllo fekk revansje sundag då han vart nummer 18 totalt og hadde nest beste tid av 18-åringane. Markegård vart nummer 31 av 88 startande.

Hevda seg

I jentene sine slalåmrenn var det ingen hallingar som hevda seg i toppen laurdag.

Guro Hvammen er syster av Kjetil, og vart best med ein 21. plass sundag. Ho var tre sekund og 52 hundredelar bak vinnaren Chiara Gmuer frå Sveits, men hadde bestetid av 17-åringane.