Trening for integrering
Kvar veke arrangerer Hallingdal FK fotballtrening for asylsøkarar i Gol, Hol og Hemsedal.
Fotball: – Ok gutar, skal me starte? To og to saman, éin ball.
Trenar Pavel Kaczorowski gir instruksjonar til dei åtte karane som har kome frå asylmottaket i Gol til Hallingmo denne grå oktoberdagen. Kommunikasjonen foregår først og fremst på norsk.
Artikkelen held fram under annonsen.
– Nokon kan litt norsk, og fleire kan engelsk. I starten brukte me ein av dei som kunne best norsk som tolk, men no flyt det fint, forklarar HFK-trenar Jan-Eirik «Jansen» Thorberg på sidelina.
Ivrige
Kvar onsdag klokka ti, gjennom heile hausten, har dei møtt opp. Fotballtreningane er ein del av eit integreringsprosjekt i regi av Hallingdal FK.
– Mange er veldig ivrige, sjølv om det no har blitt kaldare vêr. Me håpar å få flytta treningane innandørs frå no av, fortel Thorberg.
Gjennom prosjektet kjenner asylsøkarane at dei høyrer til.
– Fleire av dei som er med og trenar her kjem også for å sjå kampane til HFK, seier Thorberg.
Møter opp kvar onsdag
Rahmad Ullah Sherzad kom til mottaket i Gol for tre månader sidan. I to månader har han møtt opp på Hallingmo kvar onsdag.
– Det er veldig bra med trening og trenarane er flinke, seier han.
Sherzad har vore eitt år i Norge. Før han kom til Gol budde han på mottak i Modum.
Artikkelen held fram under annonsen.
– Der var det også eit tilbod om fotball. Eg likar å vere i aktivitet, smiler han og speler den gule ballen til ein av dei andre karane.
Hemsedal og Hol
HFK arrangerer fotballtrening for asylsøkarar i Gol, Hol og Hemsedal. Det er Kaczorowski og Paul Olav Brevig som køyrer treningane i Gol. I Hemsedal og Hol er det Brevig åleine som er ansvarleg.
– Dei hadde nok venta lenge på eit slik opplegg, for det er veldig populært, seier Brevig.
Han bur sjølv i Hemsedal og køyrer heile den lange vegen til Hol for å halde treningar der.
– Det er langt, men veldig moro når dei er så gira, fortel han.
Turnering for integrering
Fotballtreningane er det første integreringsprosjektet HFK arrangerer. Men erfaringane er gode og håpet er å halde fram.
– Me prøver å lage eit ordentleg opplegg, så me har nokon av våre beste trenarar på jobben, seier Thorberg.
Prosjektet har fått støtte frå mellom anna Gol og Hemsedal kommunar, Sparebank 1 og UDI. Laurdag 5. november skal det arrangerast ei turnering for integrering på Gol.
Artikkelen held fram under annonsen.
– Der skal denne gjengen stille eit par lag, og så kjem gutane frå Hemsedal og Hol også. I tillegg vil vaksenopplæringa og fleire andre som stiller lag. Det blir ei turnering der det viktigaste er å delta, fortel Thorberg.
Han oppfordrar fleire til å stille lag.
– Det er berre å ta kontakt med oss og hive seg med, smiler han.