– To knepp til høgre
– Spenningsnivået er høgt i dag. Innskytinga er dårlegare enn vanleg. Du må skru to knepp til høgre.
Følg skiskyttarfestivalen på Liatoppen direkte HER.
Innskytingsleiar for Fossum, Anders Straumsnes, stod bak kikkerten og følgde innskytinga til Fossum-løparane før Larsen-stafetten på Liatoppen fredag.
Artikkelen held fram under annonsen.
– Du må skru to knepp til høgre, var siste beskjeden Straumsnes rakk å gi til Alexandra Rud (14) før standplassjef Eilev Sørbøen bles i fløyta og signaliserte at innskytinga var over.
Alexandra var ikkje den einaste som måtte skyte ekstraseriar, og stille fleire gonger på siktet, før ho fekk klarsignal til å setja våpenet i geværstativet.
– Dei fleste skyt dårlegare enn vanleg i dag. Det er tydeleg at spenningsnivået er ekstra høgt, sa Straumsnes.
– Må skyte bra
Spenninga var ikkje mindre i startområdet på andre sida av gjerdet. Der stod smørjeekspertar på rekkje og rad og la siste finpussen på skia.
– Strukturen er viktigare enn glidproduktet. Ein må bruke grov struktur. Det er spådd regn utover dagen, og då blir det meir sug i snøen, sa smørjeekspert for Østre Toten, Vegard Hansen.
Han børsta skia til Angelo Mag-Isa (14) som skulle gå fyrste etappe for Østre Toten.
Angelo stod smånervøs og venta på at skia var klare og hadde taktikken klar.
– Eg skal prøve å skyte bra, det er viktigast. Så får eg sjå an farten til dei andre, sa han.
Artikkelen held fram under annonsen.
– Ein god start
Fredag small startskotet for den 30. skiskyttarfestivalen på Liatoppen. Opphaldsvêr, lettskya, vindstille og nokre plussgrader møtte dei vel 1100 løparane i alderen 8–16 år som avsluttar sesongen med tre dagars konkurransar.
– Her er alt som det skal vera. Skodda ligg som ein graut i dalbotnen, men her oppe er det klart og fint, sa speaker Arnstein Sørbøen då han ynskte velkomen til stafett og jubileum.
Det var stafetten i eldste guteklasse (13–16) som var opningsdistanse for Bendit Liatoppen skiskyttarfestival. Så gjekk det slag i slag til langt utpå ettermiddagen før siste løpar kryssa målstreken og reiste til Ål sentrum for å delta i opningsshowet. Der var eliteløparane Tarjei Bøe, Ole Einar Bjørndalen og Marte Olsbu med og kasta glans over massemønstringa.
Skiskyttarfestivalen held fram med individuelle renn laurdag og sundag.
– Dette gjekk fint, me har fått ein god start, sa rennleiar Svein Furuhaug, og konstaterte av fyrste vekslinga gjekk smertefritt.
– Eg kjenner meg att. Det vekkjer gamle minne å sjå spente utøvarar gjera seg klare til start.
Tarjei Bøe var på plass opningsdagen under skiskyttarfestivalen på Liatoppen fredag.
Han stod i vekslingsområdet og roa nervane og prata med spente løparar som hadde gått eller skulle gå stafett. Eit klapp på skuldra av den populære og blide stryningen var god medisin, anten det hadde gått bra eller dårleg.
– Det var her eg starta karrieren, så det vekkjer gamle minne og er moro å vera tilbake. Eg hugsar det var stort å avslutte sesongen på Liatoppen. Eg kjenner meg att når eg ser spente løparar gjera seg klar til start, sa Bø midt i mylderet av stafettløparar.
Tarjei Bø er ein av fleire eliteløparar som kjem til Liatoppen for å kaste glans over massemønstringa i løpet av helga. Saman med Ole Einar Bjørndalen og Marte Olsbu skulle han vera med under opningsshowet i Ål sentrum fredag kveld.
– Dette er eit kjempeflott arrangemen. Eg kjem gjerne att seinare, seier Tarjei Bøe.
