Skiskyttarar i toppen på heimebane

Mange av dei lokale skiskyttarane hevda seg i teten under sesongopninga på Geilo, men seniorløparane fekk det tøft.

Skiskyting: I helga gjekk dei fyrste buskerud- og norgescuprenna i skiskyting.

Totalt var over 600 skiskyttarar på start i dei to renna på Geilo. Dei yngste klassane gjekk Buskerudcup, og fleire hallingar vann sesongstarten.

Brør i tet

I 16-årsklassen vann Åsne Skrede (Geilo) sprinten laurdag og fellesstarten sundag.

Filip Fjeld Andersen (Geilo) har opna juniorkarrieren på same måte som han avslutta sist sesong, med å hevde seg i toppen. Geilingen gjekk til topps i 17-årsklassen både laurdag og sundag. Trass i sju bom på fellesstarten var han minuttet framfor nestemann i årsklassen.

For broren Aleksander var det også ei god helg. Laurdag vart det for mange bom på siste skyting, og han var seks sekund bak sigeren.

– Eg er fornøgd med det eg gjorde i løypa, men det gjekk heilt gale på siste skyting, sa han etter sprinten. Sundag hadde han marginane på si side og vann fellesstarten i 19-årsklassen, to sekund føre Harald Øygard frå Skrautvål. I 18-årsklassen fekk Mattias Skrede med seg to andreplassar. Rasmus Schiellerup var nummer seks på fellesstarten i 15-årsklassen.

Unge, lovande

I dei yngre årsklassane var det også mange som hevda seg i toppen.

Anna Espeli vann jenter 13 framfor lagvenninna Synne Herheim, begge frå Geilo IL. Sundag var det Herheim som tok sigeren, då vart Ida Molde Lappegard (Ål) nummer tre i same klasse. Eskil Herheim vart nummer to i elleveårsklassen laurdag, sundag var han best i klassen.

Ålingane hevda seg også i toppen. Tonje Tveito (j12) vart nummer laurdag, sundag stod ho øvst på pallen. Vilde Hagen Friis (k17), Vilde Kverndal Veslegard (j15), Andrea Hallingstad (j12) og Guri Feten (j11) vart alle nummer tre på sprinten i sine årsklassar. På fellesstarten sundag vart Mari Torsteinsrud (Ål) nummer tre i j15, medan klubbvenninna Vilde Kverndal Veslegard vart nummer fire.

Sundag var Narve Kverndal Veslegard (Ål SSL) best av 18 startande i g12, med feilfri skyting var han sju sekund framfor andremann i klassen.

Starta norgescup

Seniorane gjekk dei fyrste norgescuprenna for vinteren.

I herreklassen var det to hallingar på start i løpet av helga. Beste resultat av desse var Vetle Sjåstad Christiansen sin tiandeplass på fellesstarten sundag. Med fire bom til saman på dei fire skytingane var han minuttet bak lagkamerat i Team Mesterbakeren og halvt åling, Vetle Ravnsborg Gurigard. Ut frå siste skyting låg han på femteplass, men på sisterunden vart det for tøft for geilingen, som tapte mykje på dei siste kilometrane. Pål Kristian Grue Tufte gjekk gode renn under sesongopninga på Sjusjøen sist helg, og var reserve til IBU-cup. På heimebane hadde han ikkje fullklaff.

– Det funka ikkje i dag og eg er ikkje fornøgd. Det var gode løyper og eg kan berre skulde meg sjølv, sa han etter 18.-plassen på sprinten laurdag. Sundag vart han nummer 17 på fellesstarten. Med like mange bom som Christiansen var han 50 sekund bak klubbkameraten.

Nær pallen

Ane Sandaker Kvittingen var einaste hallingjente i seniorklassen.

Ho var ikkje nøgd med niandeplassen på sprinten, men sundag fekk ho revansje med ein fjerdeplass på sprinten. Med sju bom totalt var ho to minutt og 43 sekund bak vinnar Jori Mørkve i mål. Mørkve vann suverent, med nesten to minutt ned til neste jente på lista.