Medaljedryss i KM

Hallingane reiste heim med 22 medaljar frå kretsmeisterskapet i langrenn på Konnerud.

Langrenn: KM i langrenn vart flytta frå Gravset til Konnerud fordi det var meldt sprengkulde i Hemsedal i helga.

Kuldefrykta viste seg å vera rett. Laurdag var det 19 minusgrader på Gravset og for kaldt til å arrangere skirenn. Sundag hadde temperaturen stige over kuldegrensa.

22 KM-medaljar

Hallingane gjorde eit solid innhogg på medaljefatet. Dei tok til saman 22 medaljar.

I klassiskrennet laurdag vart det to gull, fire sølv og fire bronse til løparar frå Hallingdal. I fristil sundag vart det tre gull, seks sølv og tre bronse.

Det er grunn til å nemne at i guteklassane er det vanskelegare å koma på pallen enn i dei fleste jenteklassane fordi det er større deltaking.

Jenter til topps

Alle gullvinnarane frå Hallingdal var jenter. Guro Jordheim (20) frå Hemsedal vart dobbeltvinnar i eldre junior.

Åsne Skrede (16) frå Geilo var eitt sekund frå å bli dobbeltvinnar. Ho tok eit klart KM-gull i fristil, men vart slått med eitt sekund i klassiskrennet og måtte nøye seg med sølv.

I 13-årsklassen gjorde hallingjentene reint bord. Gro Torsteinsrud, Fjellet tok gullet i klassisk med Geilo-jentene Synne Herheim og Anna Espeli på sølv og bronse.

Synne vann fristil med Anna og Gro på andre- og tredjeplass.

Medaljevinnarar

G19/20: Ola Jordheim, Hemsedal (sølv og bronse). Trym Fikke Halbjørhus, Hemsedal (sølv)

J 19/20: Guro Jordheim, Hemsedal (to gull). Gunn-Karoline Høgset, Ål (to sølv)

G-18: Emil Intelhus Brøto, Gol (sølv og bronse)

G-17: Kristen Mikkelsplass, Bromma (sølv). Bjørnar Stensrud Tyribakken, Nesbyen (sølv)

J-16: Åsne Skrede, Geilo (gull og sølv)

G-15: Kasper Herland, Hemsedal (sølv)

J-15: Mari Torsteinsrud, Fjellet (sølv). Vilde Kverndal Veslegard (bronse)

G-14: Halvor Nordhagen, Bromma (sølv)

J-13: Synne Herheim, Geilo (gull og sølv). Gro Torsteinsrud, Fjellet (gull og bronse). Anna Espeli, Geilo (sølv og bronse)