Koronakrisa: Puma-sjef Gulden kuttar i lønna si
– Å kutte i si eiga lønn er veldig enkelt. Det kan eg bestemme på to sekund, seier Puma-sjef Bjørn Gulden.
Det er FriFagbevegelse som har intervjua toppsjefen i Puma, Bjørn Gulden som har solide røter i Hallingdal. Bjørn Gulden kjem frå Geilo, og starta fotballkarrieren sin her før han gjekk vidare til norske og utanlandske storklubbar. Etter fotballkarrieren har det handla om næringslivskarriere. No er Gulden toppsjef i Puma.
Hallingdølen hadde eit større intervju med Bjørn Gulden i Haustmagaisient 2019.
Som toppsjef for ein av verdas største sportsklede-produsent, med 14.000 tilsette, har Gulden eit stort ansvar i desse koronatider. I Tyskland sette Puma ned arbeidstida til alle 1400 tilsette fram til 13. april. Folk i butikkane er ikkje på jobb, medan tilsette på hovudkontoret går 50 prosent ned i arbeidstid.
Men alle tilsette får full lønn.
Dette heng også saman med støtteordninga frå det offentlege i Tyskalnd. Staten dekker 60 prosent av lønskostnadene for tida tilsette ikkje er på jobb. Bedrifter kan sjølve dekke mellomlegget, noko Puma har valt å gjera.
Men ikkje nok med det; toppleiinga i selskapet gjer kutt i sine lønningar.
– Me må kutte kostnader. Då må me begynne med oss sjølve, seier Bjørn Gulden til FriFagbevegelse.
Dei tre toppsjefane i selskapet seier frå seg lønna for april. Resten av toppleiinga tek eit lønskutt på 25 prosent.
Puma omset vanlegvis varer for 500 millionar euro i månaden. No er omsetnaden nede i 100 millionar, men kostnadene dei same som før.
Vil du lese fleire nyheiter om koronaviruset? Sjå vår samleside her
Artikkelen held fram under annonsen.
Gulden seier til FriFagbevegelse at dei likevel prøver å gi alle 14.000 tilsette i 130 land, full løn dei neste fire vekene.
– Nokre set tilsette rett på gata. Me prøver å gå fram på ein måte som gir folk håp, seier han.
