Klare for maraton

Også denne helga er det sledehundløp - Gausdal Maraton. Tradisjonen tru stiller det lokale hundekøyrarlaget med fleire spann.

Fleire hundekøyrarar med lokal tilknyting eller medlemskap i Hallingen Hundekøyrarlag stiller til start ved Astridbekken Skisenter i Gausdal Vestfjell under Gausdal Maraton no i helga.

To jenter

GM 300 består av open klasse med åtte til 16 hundar ved start. Minimum seks hundar i mål. GM 200 er open og begrensa klasse, det same gjeld GM 150. GM 150 er klassen for junior med seksspann.

Inger Cecilie Askildt frå Ål/Oslo er påmeldt i 200 km begrensa klasse. Liv Bjørsvik frå Ål er påmeldt i 150 km begrensa klasse.

Nytt i år

Nytt av året er 300 kilometer open klasse under GM. Her er Ralph Johannessen, Petter Arnesen, Ole Sigleif Johansen og Erik Loftsgård fire lokale av 29 påmelde torsdag før løpet. Løpet går rundt Langsua nasjonalpark med sjekkpunkt i Valdres og i Murudalen. Dyrevelferd står i høgsetet. Løpet går utan følgebilar. Ekvipasjane må dermed vere sjølvforsynt og uavhengige i om lag to døgn.

Juniorklassen

Vetle Aasberg Arnesen frå Skurdalen stiller i juniorklassen også i år, som ein av to påmelde. Juniorklassen vart oppretta i fjor. Då kom Arnesen inn på ein fin 3.-plass.

2014

I fjor vann Ralph Johannessen Gausdal Maraton open klasse, heilmaraton 200 kilometer, for andre år på rad. I same klasse kom Askildt inn til ein 6.-plass på sitt første løp med storspann. I 8-spann heilmaraton køyrde hemsedølen David Wessel Johansen inn til ein 2.-plass. I 8-spann halvmaraton køyrde veteran Petter Arnesen inn til ein flott fyrsteplass av seks køyrarar. Både far og son Arnesen gjorde eit kjempeløp.