Golberg fall i kvartfinalen
Pål Golberg (25) vann prologen, men fall på oppløpet i kvartfinalen i World Cup-sprinten i Finland fredag.
Langrenn: Golingen viste storform då verdseliten starta sesongen med klassisk sprint i Kuusamo i Finland fredag føremiddag.
Gjekk på baken
Pål Golberg vann prologen og var blant storfavorittane før finalerundane. Sondre Turvoll Fossli som lada opp til Kuusamo på Golsfjellet denne veka vart nummer to, fire tidelar bak Pål.
Artikkelen held fram under annonsen.
I kvartfinalen såg det ut til at Pål hadde full kontroll og ville gå lett vidare til semifinalen.
Han hadde eit klart forsprang i siste svingen inn på oppløpet. Der sklei plutseleg skia unna, og han enda på baken.
Pål kom seg raskt på beina, men måtte nøye seg med tredjeplass i heatet. Tida var ikkje god nok til å gå vidare.
– Unødvendig
– Eit unødvendig fall. Pål hadde så klart forsprang inn på oppløpet at han kunne ha sikra seg og gått lett vidare, sa NRK-reporterane etter løpet.
Fallet i kvartfinalen får ikkje berre konsekvensar for sprintrennet. Golberg mista også truleg sjansen til ei topplassering samanlagt i minitouren.
World cup-renna i Kuusamo held fram med 10 km fristil laurdag og 15 km klassisk jaktstart sundag.
