Drøymer om landslag

Aleksander Fjeld Andersen kom heim frå Romania med to VM-medaljar og ein sterk søknad om landslagsplass.

Skiskyting: 18-åringen hadde juniormeisterskapen i Romania som hovudmål i vinter.

– Eg er veldig fornøgd med at eg ikkje vart dårlegare enn nummer fire i noko renn der nede, seier han. Meisterskapen vart avslutta med stafettar denne veka.

Saman med den norske troppen kom Aleksander Fjeld Andersen heim til Norge natt til torsdag. Norgescuprenna i helga står han over. No treng kroppen litt rolegare dagar.

– Det var greitt å kome heim til Geilo no. Men utruleg kjekt å reise med VM-troppen og få representere Norge internasjonalt. Det er ein draum alle skiskyttarar har.

Medaljefangst

Med seg i bagasjen frå Cheile Gradistei hadde han stafettgull og ei individuell sølvmedalje frå normaldistansen.

Med 19 treff på standplass imponerte han både seg sjølv og andre under opningsdistansen.

– Eg har jobba mykje med skytinga dei siste åra. Normaldistanse er ikkje det eg har vore best på, så da var det ekstra moro å lukkast der. På sprinten og jaktstarten hadde eg ein bom for mykje, oppsummerer han.

På stafetten fekk Aleksander gå andreetappen. Han hadde ei oppgåve: Skyte to fulle hus og gå så fort at han sende ankermann Harald Øygard ut med eit godt utgangspunkt.

– Eg veksla bak Ukraina og Italia, men brukte berre eitt ekstraskot og gjekk oss opp i leiinga. Det var veldig godt å kjenne at kroppen fungerte også siste konkurransedagen, når eg eigentleg var litt sliten.

Han rakk mest ikkje bli spent før ankermannen var på veg mot mål.

– Stafettgullet var nok det største, meiner han.

Norge i toppen

I fjor var geilingen med på den europeiske utgåva av ungdoms-OL. Han meiner junior-VM i år var større.

– Her var det løparar frå heile verda, og du fekk målt deg skikkeleg mot dei beste internasjonalt.

Mange av duellane stod mellom dei norske og dei russiske løparane.

– Eg vart litt overraska over kor høgt nivå me har i Norge. Er du blant dei beste i norgescupen, så er du blant dei beste i verda.

Til toppen

Sjølv om hovudmålet for i år er nådd, er det framleis viktige renn igjen i sesongen.

– Eg har planer om å gå norgescup i langrenn på Hovden neste helg, og så er det jo junior-NM i Trondheim før påske, seier han.

Meisterskapen i Romania var hans første junior-VM, og med fullklaff har han to moglegheiter igjen til å hente fleire medaljar. Draumen om ein plass på juniorlandslaget lever for alvor.

– Det hadde vore utruleg kjekt. Eg føler at det bør vere mogleg etter det eg har vist no. Det ville vere eit skritt vidare på vegen for meg.