4,2 millionar til idrettsanlegg

Symjehallen i Gol, motocrossbanen i Ål og snøkanonar på Gravset i Hemsedal får mest av spelemidlane som går til Hallingdal i år.

I Gol er einaste tildelinga 1,4 millionar til rehabilitering av ventilasjonsanlegget i den kommunale symjehallen. Pengane er siste løyving av fleire til dette prosjektet.

Ål får Hallingdal Motorcrossklubb 1 million kroner til motocrossbanen ved Oppsjø. Fjellet Il får 635.000 kroner til eit tilbygg til garderobeanlegget ved Liatoppen skisenter.

Snøkanon

I Hemsedal går den einaste tildelinga til snøkanonanlegget på Gravset. Søkar er Hemsedal Il. Beløpet 700.000 kroner.

I Hol er det skyttarrørsla som får midlar. Skytebanen i Hovet som Hovet og Hol Skytterlag driv får 253.000 kroner til elektroniske skiver på 200 meter banen. Innandørsbanen på 15 meter i Geilohallen er tilgodesett med 247.000 kroner. Geilo Skytterlag er søkar.

Nærmiljø

Det er hovudutvalet for regionalutvikling og kultur i Buskerud fylke som fordeler pengane. I tillegg til midlar som skal nyttast til organisert idrett er det også fordelt til nærmiljøanlegg. Dette er pengar som skal brukast på mindre anlegg for uorganisert aktivitet.

Ål og Hemsedal får pengar til nærmiljøanlegg. I Ål blir det 169.000 kroner til klatreanlegg/hinderløype ved Torpo skule. I Hemsedal 194.000 kroner til nærmiljøløype på Gravset og 57.000 kroner til nytt orienteringskart i området Lio – Movatn.

Auke

I alt er Buskerud tildelt 47,3 millionar kroner. Dette er ein auke på nesten 10 millionar frå året før. Kommunane Røyken og Drammen tek den største delen av potten med 9- og 7 millionar til ulike anlegg.

Spelemidlane kjem frå overskotet frå spela Norsk Tipping driv. Fordelinga har dei siste åra vore 45,5 prosent til idrett, 36,5 til kultur og 18 prosent til samfunnsnyttige og humanitære organisasjonar. Opprinneleg vart pengane delt likt mellom idrett og kultur.