Kontrollert grisekøyring på isen: – Mamma har ikkje turt å sitte på enno
Ungdommar frå heile Hallingdal møtte opp på Tisleifjorden for å køyre bil og firehjuling på isbanen.
– Fyrst er det sikkerheitskurs. Etterpå skal me køyre, fortalde Mikkel Brusletto (20) som var på Tisleia-arrangementet for andre gong.
Han hadde tatt med seg kjærasten Enea Embre (19), systera Malin Brusletto (16) og Bjørnar Gunhildgard (17). Alle fire frå fleire plassar i dalen, frå både Geilo, Ål og Gol.
Artikkelen held fram under annonsen.
Foredrag og kurs
Dei sat i eit fullstappa telt og venta. Klokka 11 vart det halde eit foredrag gjorde sterkt inntrykk, om ei ulykke i Hallingdal, der eit ungt liv gjekk tapt.
Kari Birgit Møllerplass frå politiet, heldt foredraget. Det var heilt stille i salen. Dette vart nok ein viktig vekkar for både vaksne og unge, om kor farleg det kan vere å sitte bak rattet.
Etter foredraget vart det halde sikkerheitskurs, før ungdommane fekk utdelt kvikklunsj og sende ut på fjorden for å teste køyretøya på det massive isbaneanlegget.
– Det er heilt rått. Det er delt inn i fleire baner, med øvelsselskøyring, UTV og ATV og for køyring med førarkort. Det er utruleg bra laga til, ein dag som denne. Ein dag i året der dei opnar opp for alle, fortalde Mikkel Brusletto.
Fyrar i gang
Han gjer seg klar for å komme seg ut på banen. Bilen han skal bruke er kvardagsbilen, ein BMW.
– Eg var jo med i fjor også, men i år har eg sprekare bil.
Året før var det BMW`n til kjærasten Enea som vart brukt, men i år skal han køyre sin egen.
– Eg køyrde hennar i fjor, men den var ikkje sprek nok. Det var ikkje nok hest, så me oppgraderer litt i år.
Artikkelen held fram under annonsen.
Gunhildgard har UTV heime, men vel å vere passasjer saman med Malin Brusletto og Enea Embre.
Det kan vere fare for å få nokre skraper i fangarar og skjermar denne dagen, men ungdommane meiner at det er likevel verdt det for å få vere med på dette.
– Det er jo moro. Når ein fyrst får lov til å leike seg litt, så må me nytte sjansen.
Viktig, lærerikt og moro
Henrik Ness (26) og Sara Brenno (16) er to som også var på isen denne laurdagen. Dei var skjønt einige om at dette er eit lærerikt arrangement, og at dei meiner fleire bør komme å vere med på dette neste år.
– Eg har vore med nesten kvart år sidan eg fekk lappen. Det er kjempebra at det er mange folk her. Og det er jo kjempemoro, bekrefta Ness.
Han har hatt fleire bilar og har «brukt opp» nokre av dei på isen, gjennom åra.
– Men ein lærer å køyre bil, da.
Det kan bli ein dyr hobby om ein skal ta det heilt ut, men dette er også ein del av både lærdommen og moroa, ifølgje Ness.
Artikkelen held fram under annonsen.
– Det er difor eg har denne bilen her, det er vinterbil. Men det har vore fleire, mest Audi. Det er det det går i.
Han poengterer at det er viktig å øve på glatt føre, og at det er slik ein blir ein god sjåfør ute i trafikken også.
Sjå fleire bilete her:
Bilete 1 av 11
Sol, fint vêr og breie, trygge isbanar der ungdommane kunne trene trygt.Bilete 2 av 11
Tisleiafjorden var til å samanlikne med «Svanesjøen» då Alex Gabrielsen dansa med bilen sin bortover isen.Bilete 3 av 11
Kompisgjengen hadde nok vore passasjerar hos Alex Gabrielsen tidlegare, for det var ikkje teikn til skremte fjes.Bilete 4 av 11
Mikkel Brusletto sette nedover isen med sin BMW, som han meinte var eit betre alternativ enn kjærasten sin.Bilete 5 av 11
Det kan sjå ut som folk vart svoltne utover dagen, for det var mykje folk i køen framfor grillvogna då den opna.Bilete 6 av 11
Nokre må halde litt kontroll, og her er nokre av dei. Helene Rustberggard (t.v.) har tatt over leiarpinnen, etter at arrangementets mor, Turi Gjestemoen gjekk av som pensjonist.Bilete 7 av 11
Eskil Turhus rakk nok berre så vidt ein grillpølse denne dagen. Hans firhjuling var mest å sjå bak ei snøføyk utpå isen.Bilete 8 av 11
Som sagt, det gjekk i eitt. Det er usikkert om kameratane rakk nokon matpause denne dagen, men det er lite truleg.Bilete 9 av 11
Ida Korsdal Gjøystdal (17) hadde med seg far sin som copilot. Ho har gått vidaregåande i Numedal, og har ikkje fått tatt lappen enda. -Men eg skal ta den, uansett om det blir etter eg har førarkort på bil.Bilete 10 av 11
Ifølgje Sara Brenno skal dette ha vore ein av «verstingane» på banen denne dagen. Men for ein journalist utan noko greie på desse køyretøya, så måtte eg berre ta Brenno på ordet.Bilete 11 av 11
Ida Korsdal Gjøystdal i full driv ned mot svingen. Også ho ligg breitt gjennom løypa, med far sin som sikkert måtte klore seg fast i takhempa.Jentene viste også musklar på banen
Sara Brenno har køyrd bil sidan 2022, og har vore mykje på bilcrossbanen. Fyrste gong ho sette seg bak rattet på ein bil med manuell giring, var på løp på Fuglehaugen i Gol. Her handlar det om å reagere fort, og då er det om å gjere å treffe, i alle fall omtrent.
– Eg berre røskar den i gir og satsa på at det var riktig når eg køyrer på banen.
Ho tok med seg tanta si i setet ved sidan av, og tanta tok det med eit smil.
– Mamma har ikkje turt å sitte på enno, fortalde sjåføren frå Gol medan ho drog i brekket gjennom ein sving.
