Kursendring

For andre gong på kort tid bergar Senterpartiet to av fanesakene til dei blåblåe; frislepp for snøskuterkøyring i utmark, og forbod mot tiggarar.

Meir liberale reglar for snøskuterkøyring har lenge vore blant kampsakene til Fremskrittspartiet – og delvis Høgre. Kort tid etter valet bestemte regjeringa at forsøksordninga med lokalt forvaltningsansvar og meir liberale snøskuter-reglar skulle utvidast. Alle som søkte om å få delta i forsøksordninga fekk ja. Til saman 108 kommunar.

Frisleppet utløyste sterke reaksjonar. Den Norske Turistforening (DNT), Friluftslivets fellesorganisasjon (FRIFO) og arbeidsgjevarorganisasjonen Virke klaga avgjerda inn for Sivilombodsmannen.

I forrige veke kom svaret. Sivilombodsmannen stemplar forsøksordninga som ulovleg. Han rettar også krass kritikk mot regjeringa. «Forsøksordningens omfang ligger utenfor de rettslige rammene som forsøksloven setter», skriv sivilombodsmann Arne Fliflet. Med andre ord – regjeringas opplegg er altfor omfattande til å kunne kallast eit forsøk. DNT, FRIFO og Virke krev at regjeringa stoppar forsøksordninga og heller førebur ei lovendring for Stortinget. På Stortinget har Venstre, Arbeiderpartiet, SV og KrF sett fram eit likelydande krav.

Men miljøvernminister Tine Sundtoft (H) og regjeringa står på sitt. Snøskuterforsøket blir ikkje stoppa. Og Sundtoft får hjelp av Senterpartiet. Dermed har dei blåblåe fleirtal for å gå vidare med forsøksordninga når saka kjem opp for Stortinget i dag.

Dette er oppsiktsvekkjande og arrogant. Sivilombodsmannen er Stortingets eigen ombodsmann. Rett nok er ikkje avgjerslene juridisk bindande. Men Stortinget har slått fast at forvaltninga skal rette seg etter konklusjonane. Denne gongen gir regjeringa og stortingsfleirtalet blaffen i Sivilombodsmannen. Kva blir det neste?

Men like oppsiktsvekkjande er Senterpartiets omfamning av regjeringa. For godt ei veke sidan fekk dei blåblåe hjelp til å innføre tiggarforbod. Dette har vore ei viktig markeringssak for Høgre og Fremskrittspartiet. Tiggarforbodet skulle synleggjera høgredreiinga i norsk politikk. Og Senterpartiet vart med på lasset.

Frislepp av snøskuter skulle også assosierast med nye kostar i regjeringsbygget og ekte høgrepolitikk. På ny strekkjer Senterpartiet ut ei hjelpande hand.

Omfamninga markerer ei kursendring i Senterpartiet. Partiet manøvrerer seg stadig tettare opp mot dei blåblåe – som eit alternativ til støttepartia Venstre og KrF. Dermed får Erna og Siv større handlefridom. Dei får fleire hestar å spele på. Dette passar Senterpartiet godt. For ingen er betre på hestehandling enn nettopp Senterpartiet.