Frå bedehus til lagerbygg
For det er dét det heiter, forsamlingslokalet og bedehuset i Rukkedalen i Nes.
17. januar 1932 vart det innvigd etter stor dugnadsinnsats av innbyggarane i Eidal krets. Og det er innbyggarane her som framleis eig huset. Eller rettare sagt dei innbyggarane som er medlemmer av Den norske kyrkje.
Artikkelen held fram under annonsen.
No blir dei inviterte til møte om det gamle forsamlingslokalets framtid. For det er liten tvil om at det har sett betre dagar. På utsida gror det til, og inne er det heller vorte lagringsplass. Stolar, bord og sofaer er stuva saman. Ein skiboks ligg like framfor talarstolen der Magnus Landstads salmebok frå 1926 kviler slik den vart forlaten siste gongen det var møte her. Ved sida av ligg Bibelen og ein gradestokk som viser ni grader. Nedbrende gule stearinlys vitnar om at det siste arrangementet her kan ha vore ei påske. Men det er mange år sidan no. Etter 1980 har det vore lite aktivitet. Ingen dei seinare åra. På veggene heng framleis bilete av husets to viktigaste menn: initiativtakaren Peder Sandsbak og Jesus Kristus. Tru kva dei ville sagt om utviklinga?
Mykje aktivitet
– Det beste vil vere at det framleis er aktivitet her. Men det er lite truleg, seier Ola Arnfinn Haraldset.
Saman med Lars Aasen viser han rundt i forsamlingslokalet. Dei minnest begge ei tid med mykje aktivitet, som juletrefestar, basarar og møte med fullt hus.
– Hit kom også predikantar og emissærar. Frå hausten og utover vinteren var det møte, seier Aasen.
Men det er svunnen tid no. Spørsmålet er kva bygdefolket vil med bygget. Møtet torsdag kan avgjere det.
– Siste 15 åra har det vore nesten heilt ubrukt. Viss det blir ståande slik i fleire år, vil det forfalle, seier dei.
Selje eller rive?
Alternativa er fleire: Å la huset stå som i dag, selje og/eller rive huset. Nes menighetsråd er heller ikkje interessert. Her har dei same utfordring med kyrkjelydshuset på stavkyrkjetomta i Gamle Nes. Også det står ubrukt med usikre framtidsutsikter.
– Det er betre å selje huset enn å la det stå slik, seier Haraldset om Eidals krets kristelige Forsamlingshus.
Artikkelen held fram under annonsen.
Bygginga vart starta i 1931. Peder Sandsbak, som var lærar i skulekrinsen, var ei drivkraft. Truleg kom planane om bygginga av det nye forsamlingslokalet på bordet då pinserørsla kom til Rukkedalen og bygde sitt eige bedehus. I dag er det derfor to bedehus i Rukkedalen. Dei ligg berre 100 meter frå kvarandre.
