Viktig klubbsamarbeid: – Utan dette kunne me halde fram å trene, men ikkje spele kampar

Det vart tap, denne gongen også. Men det er betre å kjempe enn å gje opp heile handballen.

Handball: Sundag var det to kampar med seriespel i idrettshallen på Nesbyen. Heimelaget var eit relativt nystarta blandingslag, Nesbyen/Gol J15.

Først vart det 15-23-tap mot Nedre Sigdal. Og etter ein pause med energipåfyll, møtte dei Vikersund/Åmot til kamp nummer to. Det vart tap der også, men dei var meir hissige i angrepsspelet i andre kampen og fekk inn fleire mål, 21-28.

– Gøy å spele kampar

Det er kanskje berre dumt å nemne klisjeen om at det viktigaste er ikkje å vinne, men å delta. For Julie Hagen er dette likevel heilt reelt.

16-åringen var del av eit godt handballmiljø i Gol, men på jentelaget sleit dei med fråfall av spelarar. I haust var dei for få til å kunne stille eige lag. Eit samarbeid med Nesbyen IL vart løysinga for å kunne halde fram å spele handball i serien.

– Kva hadde skjedd utan samarbeidet?

– Då trur eg me berre hadde halde fram med treningar, utan å kunne spele kampar. Men det er jo gøy å spele kampar òg, seier Hagen.

To gode naboar

Ho er ei av fem-seks golingsjenter på blandingslaget. Ho er glad naboklubben har opna døra på gløtt. Dei hadde ikkje trengt å gjere det, for Nesbyen IL har nok handballjenter til å klare seg sjølv.

For at jentene ikkje skal bli sitjande for lang tid på benken, har dei løyst det ved å stille to lag. I tillegg til blandingslaget, har dei også eit Nesbyen-lag. Men det er eit Nesbyen-lag mest på papiret, for det er ikkje tette skott imellom.

– Me frå Gol spelar nok mest på blandingslaget, men me hjelper til på Nesbyen-laget om det trengst.

– Me bomma, rett og slett

I årets serie har blandingslaget så langt spelt fem kampar. Det har blitt fem tap, Nesbyen/Gol ligg nedst på tabellen, som nummer ti. Det andre Nesbyen-laget har spelt ein kamp meir, og kan notere seg med ein siger, to uavgjort og tre tap. Dei ligg på sjuandeplass på tabellen. Hagen ser likevel lyspunkt i spelet til Nesbyen/Gol:

– Me var ganske gode i forsvar, men sleit med å få ballen i mål.

– Kva gjekk gale?

– Me bomma, rett og slett.