Ver forsiktig i bratta - farleg fokksnø

Etter fleire snøskred den siste veka har det no blitt meir stabile forhold i fjellområda i Hallingdal.

Det har vore mykje skredaktivitet den siste veka. Førre helg vart to personar teke av skred i Hemsedal, ein ved Reidarskaret og ein annan på Skogshorn, melder nettstaden Friflyt.no.

Vinden er syndaren

Tysdag gjekk det også eit skred i søraustleg heng ved Hemsedal skisenter. Skredet hadde brotkant på opp til 60 cm og gjekk i fokksnø. Onsdag vart det observert fleire ferske flakskred austvende fjellsider på Hemsedalsfjellet, skriv skredvarslinga på varsom.no.

Rune Abrahamsen er skredobservatør i Hemsedal og kan melde at forholda no har betra seg.

– Grunna mykje vind losna det mange skred i område med fokksnø. Denne snøen har no stabilisert seg, fortel han.

Før palmehelga melder nettstaden varsom.no om moderat skredfare i fjellområda i Hallingdal.

Sjå etter fokksnø

– Snøen er mange stader så hardpakka at det må komme meir nedbør om skredfaren skal auke. Men det finst framleis område med laus snø også, forklarar Abrahamsen.

– Laurdag er det meldt mykje vind i fjellet. Vil dette påverke skredfaren?

– Det vil vere fare for skred der vinden har ført med seg laus snø, seier skredobservatøren.

Snøskredvarslinga ber folk vere varsame i leområde med fokksnø.

– Hald avstand til kvarandre ved ferdsel i terreng over 30 grader. Det er størst fare for å løyse ut skred på kul-formasjonar i terrenget og der fokksnøen er mjuk, står det i skredvarselet for Hallingdal.

Tenk konsekvens i bratta

Det er også meldt om eit vedvarande svakt lag av snøkrystallar lenger nede i snødekket. Det krev mykje kunnskap for å kjenne att slike svake lag. Drønnelydar og skytande sprekkar er tydelege teikn, men fråvær av desse betyr ikkje at det er trygt.

– Ver ekstra forsiktig og tenk konsekvens når du gjer vegval, særleg i ukjend terreng, skriv varsom.no.