Slik stemte elevane i skulevalet

Arbeiderpartiet fekk størst oppslutning under skulevala ved dei vidaregåande skulane på Gol og Ål. Ved Numedal vgs. er Senterpartiet størst med Ap som nummer to.

Siste veka har det vore skuleval ved dei vidaregåande skulane.

Ved Numedal vgs. var det skuleval 26. august. Ved Gol vgs. gjekk elevane til valurna 28. august, medan elevane ved Ål vgs. hadde skuleval 3. september.

Sjå resultata frå skulevalet her.

Arbeiderpartiet størst

Skulevalet viser at Arbeiderpartiet har størst tillit blant elevane ved i Gol og Ål.

Av dei 270 elevane som gjekk til valurna på Gol, fekk Ap 69 røyster. Det gir ei oppslutning på 27,5 prosent.

Ved Ål vgs. var også Arbeiderpartiet størst med 60 stemmer. Det gir ei oppslutning på 30 prosent av dei 208 elevane som røysta.

Også ved Numedal vgs. fekk Ap stor oppslutning med 34 av 133 stemmer. Men der måtte Ap nøye seg med andreplass bak Senterpartiet.

Senterpartiet nummer to

Senterpartiet har nest størst tillit blant dei vidaregåande skuleelevane i Hallingdal og Numedal.

Ved Numedal vgs. var Sp klart størst med 52 av 133 røyster.

På Gol fekk Sp 20,7 prosent av stemmene, medan Senterpartiet fekk 24 prosent av stemmene på Ål.

Høgre på tredjeplass

Det var listene til Viken-valet skuleelevane hadde å velja mellom. Ved det nye fylkestingsvalet er det heile 18 lister å velja mellom.

Av regjeringspartia er det Høgre som har størst oppslutning blant skuleungdommen. Ved Gol vgs. fekk Høgre 15,9 prosent av stemmene, og ved Ål vgs. 13,5 prosent.

I Numedal fekk Høgre åtte stemmer av 133 stemmer.

Fremskrittspartiet har klart størst oppslutning blant elevane ved Ål vgs. med 7,0 prosent. På Gol er det berre 4,4 prosent som stemte Frp, medan partiet berre fekk to stemmer i Numedal.

Venstre fekk mellom fem og seks prosent av stemmene. For Kristeleg Folkeparti var skulevalet elendig ved alle tre skulane.

Ikkje miljø og bompengar

Sosialistisk Venstreparti gjorde eit bra val på Gol med 12,7 prosent. På Ål var oppslutninga til SV berre fire prosent, medan 8 av 133 elevar i Numedal stemte på SV.

Skulevalet tyder på at skuleelevane i Hallingdal og Numedal ikkje er så opptekne av miljøkamp og bompengar.

På landsbasis har Miljøpartiet De Grønne (MDG) kraftig vind i segla i valkampinnspurten. Men det gjeld ikkje i same grad blant skuleungdommen i Hallingdal og Numedal.

På Gol fekk MDG 6 prosent, og på Ål 3,5 prosent. I Numedal måtte MDG nøye seg med ei einsleg stemme.

Skulevalet viste at elevane i Hallingdal og Numedal heller ikkje er så engasjert i kampen mot meir bompengar. Folkeaksjonen nei til meir bompengar fekk ei oppslutning på 2,5 prosent ved Ål vgs. Ved Gol vgs. var det berre ein einaste elev av 270 som stemte på protestpartiet mot bompengar.

Valoppslutninga under skulevala var høg. Rundt 90 prosent av elevane brukte røysteretten.