Slik såg fotballbanen ut laurdag - russen beklagar og møttest for å rydde
Det gjekk hardt for seg på kunstgrasbanen ved Gol vgs i helga. Laurdag ettermiddag var russen si ryddegruppe i sving.
Laurdag fekk Hallingdølen tips om at fotballbanen ved Gol vidaregåande skule, også kjent som «Gamle Grus» har fått hard medfart i helga. På kunstgraset låg det raude koppar, ølboksar, knuste glasflasker og brukt snus.
Då Hallingdølen ringde russepresident Ida Marie Nerheim ved 15.30-tida kunne ho fortelje at ei ryddegruppe alt var på veg til «åstaden».
Artikkelen held fram under annonsen.
– Eg skjønar at folk reagerer. Det ser jo ikkje heilt bra ut, seier ho.
Knust glas
Då Hallingdølen besøkte fotballbanen tidlegare på dagen var det fleire barn og unge som leikte i området. Nokre av dei samla russekort frå bakken og prøvde å rette ut att smadra ølboksar for pant. Fleire stader låg det store bitar med knust glas. Dette beklagar Nerheim:
– Me forstår at det særleg er dumt med knust glas, og at dette kan vere vanskeleg å få bort. Difor har russen eigentleg forbod mot glas i nærleiken av banen, seier ho. Russepresidenten seier dei er førebudd på å ta konsekvensane viss banen må ryddast med anna type utstyr.
Banen er rydda
Fredag var det duka for det årlege «rebusløpet» til russen, og difor vart banen tatt i bruk. Det var mange ungdommar ute denne kvelden, både russ og andre. Det er ikkje lagt opp til fleire arrangement på dette området, seier Ida Marie Nerheim.
– Det skal sjølvsagt ikkje gjenta seg. Me ønsker ikkje å lage dårleg stemning, seier ho.
Hallingdølen tok turen ned att laurdag ettermiddag for å besøke ryddegruppa. Dei var ved godt mot. Klokka 16.10 var det nesten ingen spor å sjå etter fredagens fest. Søpla var rydda vekk og dei hadde etter beste evne prøvd å sope opp glasbitane frå banen. Dei beklaga seg på nytt og innrømte litt sjenert at det kanskje burde vore rydda nokre timar tidlegare på dagen.
Hallingdølen har vore i kontakt med Gol IL, som seier dei set stor pris på at russen har tatt ansvar og rydda opp etter seg.