Renovasjonsbilane på høggir: – Smekk fullt kvar dag

Renovasjonsbilane til Hallingdal Renovasjon rekk knapt å tømme avfallspunkta før dei er fulle att.

Som driftsleiar for renovasjon i Hallingdal Renovasjon IKS Torgeir Vestenfor seier:

– Me køyrer alt me kan. Kikut på Geilo og Trondrud i Nes er dei to travlaste. Der er det smekk fullt kvar dag. Men me klarar å halde unna med ein bil kvar dag.

Ikkje dimensjonert

Fredag ettermiddag fekk Hallingdølen tilsendt bilete frå Golsfjellet.

Også her er returpunkta fulle. På Golsfjellet hentar Hallingdal Renovasjon avfall annankvar dag.

– På Golsfjellet er det vanlegvis nok. Men no er det så mykje avfall blir det fullt her også. Punkta på Golsfjellet er ikkje dimensjonerte for å ta trafikktoppane som er no, seier Vestenfor, som fredag ikkje hadde fått klager frå dette området.

– Er det meir folk her no i jula enn før?

– Eg har ingen tal. Men det blir meir og meir. I år er det lang juleferie også. Då kom dei opp før, og då vart me tekne litt på senga. Det har vorte ekstra mykje i år, seier Vestenfor.

Travelt

No rustar Hallingdal Renovasjon seg til årets travlaste dagar:

Nyttårshelga.

– Normalt er nyttårshelga tøffast. Når 2. januar er vanleg arbeidsdag, skal alle heim 1. januar. No har me litt problem med to av renovasjonsbilane som me arbeider med å løyse, seier Vestenfor.

Men, understrekar han:

– Me er betre førebudd enn nokon gong.