Open for å tenkje annleis om bustadtilskot: – Det er ikkje alltid alt ein ser når ein blir begeistra for ei sak
Saka om bustadstøtte kjem opp i Ål formannskap måndag. Dei treng meir pengar.
Senterpartiet er klar for putte meir pengar i potten, Høgre meiner saka burde vore greidd ut meir. Arbeiderpartiet er i tenkjeboksen, skal me tru ordføraren.
– Det har vore ein fantastisk respons, konstaterer Ål-ordførar Solveig Vestenfor om bustadtilskotet dei lanserte for eit par veker sidan.
Artikkelen held fram under annonsen.
Vil høyre på gruppa
– Men så er det mykje pengar. Er dette rett måte å prioritere det overskotet me har? Det trur eg det vil bli ein runde på, også i partiet vårt.
Arbeiderpartiet i Ål hadde denne veka gruppemøte på saka. Vestenfor er på landsmøtet til Arbeiderpartiet og deltok ikkje.
– Eg er veldig open for kva gruppa meiner. For det er viktig å tenke eventualitetar. Det er ikkje alltid alt ein ser når ein blir begeistra for ei sak.
Etter å ha sett på tala som vart lagt fram frå kommunen, på kor mange søkjarar og kva for prosjekt det er søkt om, blir ordføraren glad.
– Det er på mange måtar veldig bra at unge folk får ein start i bustadsituasjonen. Det er god breidde i kva for prosjekt folk er i gang med. Nokon med gard, andre med bustader i grender og i sentrum. Så ser me at private aktørar kan ha fordelar av dette.
Sjå til Hol?
– Det har vore nokon som ikkje får tilsegn fordi dei starta bygging eller kjøpte seg hus «for tidleg», er det rettferdig?
– Det har vore uro rundt at det har gått vel fort og vorte urettferdig med tanke på dei som kjøpte hus i mars. Det skjønar eg, men ein må sette ein dato.
Artikkelen held fram under annonsen.
– Ein ting er å gje tilbakemelding til dei som er interessert, ein annan ting er å gje forutsigbarheit over tid. I Hol har dei til dømes sett ei grense på ti prosent (dei gjev tilskot på maks 200.000 kr, red.merk.), er det ei innretting å sjå på? Det blir ein viktig diskusjon måndag.
– Seier noko om behovet
For sjølv om vedtaket alt er gjort i kommunestyret kan eit nytt vedtak endre det som gjeld i dag. Vestenfor er ikkje framand for å sjå det store biletet.
– Det er alltid nye moment som kan koma, og kjem det nye saksopplysningar eller viktig info, så kan ein ta opp att ei sak. Det var fleire enn meg som vart positivt overraska over at det var så mange som var interessert så fort, og noko me ikkje visste om på førehand. Det kan seie noko om behovet også.
Vestenfor meiner mange ikkje har hatt eigenkapitalen som trengst for å koma seg på bustadmarknaden, og at denne moglegheita bidreg til eit oppstartsrush som igjen gir mange søknader.
– Ideelt sett er det viktig å vera forutsigbar over tid. Det er fint å vite at ein om to år også kan søkje om pengar. Me må leggje eit godt grunnlag for det også.