No blir vegen breiare
Vegbreidda over bruene på Rv7 i Herad blir åtte meter. Det er halvannan meter breiare enn før utbetringa.
Hallingdølen har fått tips frå publikum om at det ikkje ser ut til at vegen over bruene i Herad blir breiare etter utbetringa.
Det tilbakeviser byggjeleiar i Statens vegvesen, Svein Fossen.
Artikkelen held fram under annonsen.
– Det stemmer ikkje. Den totale vegbreidda i køyrebanen blir åtte meter. Det er nesten halvannan meter breiare enn før oppgraderinga av bruene starta, seier Fossen.
Rv7 gjennom Herad har vore lysregulert sidan arbeidet med å utvide tre bruer og byggje to nye gangbruer starta i november. Det har i periodar ført til lange køar og ventetid på begge sider av anleggsområdet.
For tre veker sidan opplyste Fossen at lysreguleringa og anleggsarbeidet skulle vera over 17. mars, og at trafikken vil gå som normalt etter den tid.
– Tidsplanen var at me skulle vera ferdig 17. mars. No viser det seg at arbeidet tek litt lengre tid, og at me blir ferdige litt seinare. Men det blir slutt på lysreguleringa i god tid før påske, seier Fossen.
Grunnen til at arbeidet tek lengre tid enn planlagt, er blant anna at nedgraving av ein kommunal vassleidning blir gjort samstundes med vegutbetringa.
Byggjeleiar Fossen opplyser at det blir lagt eit mellombels fast dekke gjennom anleggsområdet i vinter. Vegen blir ferdigasfaltert til våren når det har vorte varmare i vêret.
