Næringsprisen til Hallingdølen
Hallingdølen vart tildelt næringsprisen under Hallingdalskonferansen torsdag.
Det er andre gongen HallingExpo deler ut denne prisen.
I fjor var det Hallingplast som vann. I år vart det lokalavisa.
Artikkelen held fram under annonsen.
– Overraskande, men utruleg artig, seier administrerande direktør i Hallingdølen, Christian S. Andersen.
Omstilling og kompetanse
Prisen vart delt ut på Pers hotell i Gol der Hallingdalskonferansen vart arrangert.
Årets tema var innovasjon, og dagleg leiar i HallingExpo, Pål Rørby, trekkjer fram Hallingdølens evne til omstilling og spennande satsingar dei siste åra når han grunngjev kvifor lokalavisa vann årets næringspris.
– Det handlar om omstillinga avisa har gått gjennom. Til forarging, kanskje, for mange ein periode. Det gjeld særleg betalingsløysingar på nett. Det skal litt til å stå i det løpet. Men det har vore eit rett val. Det er eg sikker på, seier Rørby.
Han peikar også på omstillinga frå berre å ha ei papiravis til å produsere innhald i fleire kanalar og i levande bilete.
– Dessutan har avisa kompetanse i eige hus. At ein tilbyr dette også utanfor huset er eit viktig steg å ta, seier Rørby.
Vil utvikle
– Eit klapp på skuldra, seier Christian S. Andersen om prisen.
For i ein bransje der dommedagsprofetiane er mange, og fleire mediehus må gjere store kutt, har Hallingdølen gått motsett veg og satsa. Siste året har avisa mellom anna sendt tre direktesende fotballkampar og ti tv-sendingar før og etter kommunevalet frå studio i avishuset.
Artikkelen held fram under annonsen.
– Me jobbar for å utvikle eigne produkt samstundes som me også tilbyr våre ressursar til aktørar i Hallingdal. Me er ei motstraumsavis. Prisen me får er eit bevis på det. Eg meiner me gjer mykje rett, seier han.
Mange dyktige
Men det er også mange andre bedrifter og næringslivsfolk i Hallingdal som gjer mykje rett, meiner Pål Rørby.
Torsdag samla HallingExpo fleire av dei til den andre Hallingdalskonferansen. Konferansen handla om å tenkje nytt og innovativt.
– Det er mange flinke i Hallingdal. Me er ikkje amerikanarar og går høgt ut, men det blir jobba bra frå dei små bedriftene til dei største, seier Rørby.
