– Mitt hjarte er ditt, Flå
Trude Kristin Klæboe har halde songkarrieren nærast hemmeleg. Onsdag kveld var ho å sjå live på NRKs tv-sending frå Flå.
400 menneske møtte opp då Sommartoget til NRK arrangerte livesending frå Flå stasjon onsdag kveld. Livesendinga bestod av lokale innslag som musikk, lokale eldsjeler og dyr frå Bjørneparken.
Heiv seg rundt
Ei av dei som underheldt direkte i beste sendetid var songaren Trude Kristin Klæboe. Det var ikkje planlagt.
Artikkelen held fram under annonsen.
- Det var veldig spontant. Bandet Darling West skulle eigentleg spela, men sat fast på grunn av flytrøbbel.
– Barndomsvenninna mi, Martha Kristin Gaptjern, ringde meg i dag tidleg og spurte om eg ville opptre.
Klæboe er frå Flå, men bur i Stabekk. Der var ho då ho fekk telefonen.
– Eg har elbil, men eg rakk ikkje å lade bilen fort nok. Eg heiv meg rundt, leigde ein bil og drog oppover, fortel ho.
Til vanleg jobbar Klæboe med musikk, og er i ferd med å gi ut ei plate. Men ho snakkar ikkje så høgt om musikken, og svært få har sett henne opptre.
– No har eg ikkje vore tilbake i bygda på eit par år. Eg er vel ein som har «blomstra seint», og få veit at eg driv på såpass seriøst med musikken. No tek eg med meg musikken heim til bygda.
Og Klæboe legg ikkje skjul på at det er ekstra spesielt å opptre i heimbygda. Ho håpar at dette kan vere inntoget til ein meir synleg karriere.
– Eg skal synge songen «Mitt hjerte er ditt», som ei kjærleikserklæring til Flå og dei som bur her.
Artikkelen held fram under annonsen.
Stas med TV
Siw Anita Davidsen Løkke og døtrene Bertine og Johanna Davidsen Løkke frå Sokna er på Flå for å få med seg hendinga.
– Det er kjekt å kunne fylle sommarkvelden med noko anna enn å berre sitje inne på sofaen, fortel mora.
Dei var også til stades då toget kom til Sokna onsdag formiddag, og dei følgde etter toget vidare til Flå.
– Me må stille opp når det skjer ting i nærmiljøet. Det er fantastisk god stemning her, og det er artig å sjå både kjentfolk og folk ein som regel ser på skjermen.
Døtrene Bertine og Johanna har gitt klem til barne-tv-stjerna Fantorangen og helst på ein programleiar i NRK Super. Likevel var det éin ting dei tykte var enda betre:
– Det beste med heile dagen var å blir filma og koma på TV, ler dei.
Overvelda ordførar
Ordførar i Flå, Tor Egil Buøen, var ein sentral gjest under sendinga og fortalde historier frå bygda.
– Det er heilt utruleg at så mange folk har møtt opp, me er trass alt midt i ferien. Folk har verkeleg stilt opp og bidrege i heile dag, fortel den letta ordføraren.
Artikkelen held fram under annonsen.
Han er fornøgd med opplegget til NRK og tykkjer programleiarane stilte Flå og innbyggjarane i eit fint lys. Han trur ikkje at dette blir ein revolusjon for Flå, men at det er til god hjelp for vegen vidare.
– Alle slike små drypp gjer at fleire får vite om Flå og kva me kan tilby. Det var stas at Sommartoget valde å stoppe her, for det er det ikkje mange tog som gjer, ler Buøen.