Millionsatsing på touren

Om tre veker er sykkelsirkuset i Tour of Norway attende på Geilo og Flå. Det kostar til saman 1,2 millionar kroner.

På Geilo bidreg ulike aktørar med kring ein million kroner for at Geilo skal få målgang for tredje etappe fredag 20. mai.

Dagen etter er Flå startstad for fjerde etappe. Pris: 200.000 kroner.

– Det er det verdt, tykkjer turistsjef i Hol, Pål Knutsson Medhus, og avtroppande dagleg leiar i Flå Vekst, Simen Hagberg.

God reklame

For direktesendt sykkel er god reklame.

Under fjorårets ritt vart Geilo-namnet nemnt 120 gonger i løpet av halvannan time på Tv2. 89 presseoppslag Europa rundt handla om sykkelrittet og Geilo. Etappane der Geilo og Flå var med vart i snitt følgd av høvesvis 195.000 og 193.000 sjåarar. På det meste følgde 348.000 etappen til Geilo. I år som i fjor sender Tv2 rittet og gjennom Eurosport-nettverket til resten av verda. Medhus anslo at fjoråret var reklame verd 30 millionar kroner. Det blir ikkje mindre i år.

– Slike tal er enkle å rekne seg fram til. Etappen til Geilo var i fjor den mest sette under rittet. Næringa er positiv. Sykkel er noko ein vil satse på, seier Medhus.

Målgang i Havsdalen

Geilo får i år som i fjor målgang for den hardaste etappen i Tour of Norway.

168 kilometer frå Rjukan over Imingfjell, vidare gjennom Nore og Uvdal til Tunhovd før målgang i Havsdalen, vil merkast. I fjor vann klatrespesialisten Amets Txurruka. I år er 14 profflag og eit samansett norsk landslag stadfesta klare til rittet. Mellom anna er Edvald Boasson Hagen (Team Dimension Data) og den sterke klassikarryttaren Sep Vanmarcke (Team Lotto NL-Jumbo) på start. Pål Knutsson Medhus meiner det er naturleg for Geilo som stad å satse for å få det internasjonale rittet til bygda.

– Får mykje tilbake

Hovuddelen av bidraget frå Geilo kjem frå overnattingsbedriftene.

Hotella bidreg med 750.000 i overnatting. I tillegg løyvde Hol kommunestyre onsdag 125.000 kroner, men det var berre halvparten av summen det vart søkt om. Eit knapt fleirtal, med røyster frå fire Høgre, tre Sp, to Venstre, Frp og KrF, sikra kronene til rittet.

– Me kjem likevel i mål, seier Medhus.

I Flå må dei ut med 200.000 kroner for å vere startstad for fjerde etappe som har målgang på Eggemoen. I fjor viste TV-bileta 24 sekund med aktiv idrett då feltet rulla roleg ut av bygda.

– Det kostar litt å få dei hit, men me får mykje tilbake, seier Simen Hagberg.

Førebels er ikkje alle pengane på plass, men Hagberg håpar det lokale næringslivet ser verdien.

– Rittet har mange sjåarar. Det er god PR. Fordelt på mange er ikkje 200.000 kroner mykje, seier Hagberg.