Med rett til vind i håret

Gjennom Sundrevegen i Ål susar ein oppsiktsvekkande trehjuling med raud kalesje.

Under kalesja sit Karin Kristiansen og Anna Tolpinrud og vinkar stolt til nysgjerrige forbipasserande. Dei er på veg til Hallingdal Feriepark for å sjå på livet og ta seg ein is i sommarvarmen.

– Eit kjempebra tiltak. Elles kjem eg meg sjeldan rundt, anna enn på butikken. Det er godt med ein luftetur, seier Karin.

Raud rickshaw

Sjølve doningen er ein elektrisk rickshaw – eller sykkeldrosje. Eit køyretøy ein elles berre ser i travle asiatiske gater. Ål helsesenter fekk han i gåve for eit drygt år sidan, og sidan då har doningen stått på lading og venta på å få kjenne asfalt under dekka. Tidlegare i vår tok Frivilligsentralen på seg ansvaret for å lære opp folk til å køyre rickshaw’en, slik at fleire eldre kan få litt etterlengta vind i håret. For nokre veker sidan vart Rolf Sveinhaug uteksaminert som fyrstemann.

Treng pilotar

To dagar i veka syklar han rundt. Kundane er folk med adresse Nigarden.

– Det blir to lufteturar for til saman fire passasjerar om dagen. Etter to turar er batteriet tomt, humrar Rolf, medan han utstyrer damene med sykkelhjelmar før heimturen. – Eg oppfordrar fleire til å melde seg som pilotar, slik at fleire som vil det kan få tilbod om ein luftetur, legg han til.

Han er ein flink sjåfør, meiner Karin og Anna.

– Det humpar og sprett litt over fartsdumpane. Men det gjer ikkje noko, smiler dei.