Lyrikar i godt selskap

Dikta til lyrikaren frå skogen har vekt begeistring – endå ein gong.

Skogsarbeidaren frå Bromma har gitt ut to diktsamlingar.

Naturen er nærverande i dikta til Terje Tørrisplass. Det er som om grankvistene skjer seg gjennom boksidene, det er dikt til ettertanke.

No har tre av dikta hans fått plass mellom permane i jubileumsboka som er gitt ut i samband med 100 årsjubileet til Norges Naturvernforbund.

– Overraska

– Eg kjende ikkje til han frå før. Det er mange som produserer gullkorn rundt omkring. Eg vart gledeleg overraska, seier leiar i Naturvernforbundet, Lars Haltbrekken.

– Kvifor Tørrisplass?

– Han arbeider i skogen og er nær naturen, og han kombinerer natur og kultur, seier Haltbrekken.

– Det er berre menneska som sviktar naturen. Til meir me øydelegg den, til trongare kår får kulturen når det gjeld å hente inspirasjon frå naturen. Me er begeistra for det han leverte.

Noko av ideen med denne boka har vore å gå til kulturen for å forklare naturen. Altså til dei som skriv om naturen og dei som fotograferer den.

Fleire store

Terje Tørrisplass debuterte i 2010 med diktsamlinga «Eg bygger ikkje byar», og han følgde opp med ei ny diktsamling i 2013, «Glenne».

I jubileumsboka til Naturvernforbundet, «Naturen sviktar aldri», er han i selskap med nokre av dei beste namna i den norske bokheimen. Lars Saabye Christensen, Hans Børli og Nils Aslak Valkeapàà er blant dei som er representerte i boka. Førsteopplaget er på 3000 eksemplar.