Leitar etter hannhunden Bolt (11) på tredje døgnet
Tysdag føremiddag forsvann den engelske setteren frå ei hytte på Imingfjell i Uvdal.
Onsdag leitte hundeeigar Thomas Glede Allum frå Svelvik langs Sønstevatn på Imingfjell, men utan hell. Torsdag føremiddag er Allum ute i skiløypene att for å leite etter den kvite og brune hannhunden. Gjennom dagen fekk han hjelp av folk til å leite på både ski og skuter.
Fredag morgon er hunden framleis sakna.
Artikkelen held fram under annonsen.
– Det er litt som å leite etter nåla i høystakken. Det er eit stort område, mykje hytter og mykje vidde. Snø og vind i dag er heller ikkje dei beste forholda å leite i, men det skal vera meld betre i ettermiddag og i morgon, seier Allum fredag morgon, som på ingen måte har gitt opp.
Forsvann ved hytta
Bolt forsvann frå ei hytte nær Imingfjell turistheim, nærare bestemt Glopphovda, rundt klokka 11 tysdag føremiddag.
– Er han kjent i området?
– Me har hatt hytte her i to år. Han er glad i lange turar, men ikkje noko særleg lenger enn på kring fire timar. Likevel er han ein seig gammal kar på 11 år, seier Allum.
Han har vorte att på hytta med ein av dei andre hundane sine i håp om at Bolt vil dukke opp.
Håpar på tips
Bolt er kvit og brun, har på seg eit blått halsband med telefonnummer og er chippa. Politiet er varsla, i tillegg er hunden etterlyst på sosiale medium på begge sider av fylkesgrensa og gjennom gruppa Rømlingen.
– Har nokon sett han?
– Nei, men eg har fått mykje råd og tips, i tillegg til mange delingar på nett. Det er veldig bra. Rømlingen gjer også ein kjempejobb. Me er takksame for alle som deler og hjelper. No håpar me nokon ser han og tek kontakt, seier Allum.
Artikkelen held fram under annonsen.