Kraftveteranen si åtvaring toppar lesinga på nett
Straumsjokkerte lesarar tyr til Osvald Medhus når dei skal prøve å forstå kva som har skjedd med straumprisen.
Til no har 18.000 lese kronikken hans om temaet.
Kraftveteranen i Hol skreiv i 2019 ein kronikk i Hallingdølen, der han forklarte endringane av kraftmarkmarknaden som var gjort sidan 1992. Han forklarte også kva for endringar som venta i samband med tilknytinga til EUs energiunion.
Artikkelen held fram under annonsen.
Sundag vart Hallingdølen-kronikken, «Fakta om krafta vår», plukka opp på nettet. I løpet av to-tre dagar er kronikken av dei mest leste sakene på hallingdolen.no
Mogleg?
– Kan det vera mogleg? Seier veteranen i Hol, når me legg fram tala.
– Det er vel ikkje til å undrast at folk er interessert nett no. Straumen kostar skjorta, og det du skreiv er trass alt eit grunnkurs i kraftpolitikk?
– Ja, det var meininga det, kommenterer ein, som vanleg smålåten på eigne vegner, Osvald Medhus.
Manglar
– Det er behov for informasjon om kraft?
– Interessa kan skuldast at det har mangla ein del moment i diskusjonen som har vore i media om dette temaet. Dei rådande politikarane, inkludert Ap, har ikkje snakka om det som verkeleg gjeld i desse sakene, seier den mangeårige Ap-ordføraren i Hol.
Han peiker på at folk har vanskeleg for å godta at kraft frå kraftverk dei har vore med og nedbetalt, skal koste fleire kroner kilowattimen når produksjonsprisen ligg på ein tiøring.
Ikkje høyrd
– Du tok opp dette i 2019. Snakka du for døve øyre?
Artikkelen held fram under annonsen.
– Ja, eg gjorde nok det. Men det kan hende at det eg skreiv løyser ut noko no. Det ville vere fint. Det blir spennande å sjå, seier Osvald Medhus.
Han legg til at innmeldinga i EUs energiunion ikkje er så uskuldig som det blir framstilt frå, mellom anna, partikollegaen, Jonas Gahr Støre. - Det som skjer no er nett det som fleire av oss frykta, avsluttar han.