I fengsel for vald

Ein mann (36) er dømt for grov mishandling av eks-sambuaren sin. Mannen må i fengsel.

Hallingdal tingrett avsa dommen onsdag: Fengsel i to år, av dette ni månader på vilkår. I tillegg må han betale den tidlegare sambuaren sin 80.000 kroner i oppreising.

I tingretten i førre veke forklarte det tidlegare sambuarparet seg motstridande. Ho fortalde om psykisk og fysisk vald i over tre år, angst og redsle. Han hevda at ho fekk angstanfall og derfor måtte halde henne nede. Ord stod mot ord. Det var ingen tekniske bevis. Retten festa ikkje lit til mannens forklaring. Ein samla tingrett trur på kvinna.

«Skubba»

Han erkjente å ha «skubba» til henne ein gong slik at ho fall og slo seg i asfalten, og at han sparka henne vennskapeleg i rumpa for å bryte isen under ein krangel. Elles nekta han for å ha utøvd vald.

Retten kom til at ho har vore utsett for grov mishandling. Han har mishandla henne jamleg både fysisk og psykisk frå januar 2012 og til mai 2015. Ved hyppige valdshandlingar i kombinasjon med nedsetjande utsegn, trugande åtferd og trugsmål om sjølvmord har han etablert eit regime av kontinuerleg utsikkerheit og frykt for vald, meiner retten, som også byggjer på vitneforklaringane i retten. Ved vurderinga av at mishandlinga er grov er det lagt vekt på det fatale skadepotensialet ved vald mot hovudet, slag/dunking og gjentatt kveling. Endeleg har retten lagt vekt på det fysiske styrkeforholdet mellom dei, aldersforskjellen er elleve og eit halvt år.

Får ein sjanse

Kvinna ønskte ikkje at han skal straffast, men at han får hjelp.

Retten trur ikkje at ein fengselsdom utan vilkår fullt ut vil få han til å avstå frå vald i framtida. Han har store utfordringar knytt til vald og aggresjon, meiner retten. Men dommarane gir han ein sjanse. Det har også gått lang tid frå tiltale er teken ut til saka kjem for retten. Under tvil får han ein deldom ved at ni månader av straffa er på vilkår. Men prøvetida er lang, tre år.

Dømt tidlegare

Dommen er også ein fellesstraff med ein tidlegare dom i Hallingdal tingrett.

Han vart dømt for vald og forulemping av offentleg tenestemann i april 2015. Forholda han er no er dømt for skjedde i prøvetida for denne dommen der delar av den var på vilkår.