Her er dei nye ambassadørane for Hallingdal

Dei har alle utmerkt seg på sine felt. No skal dei tolv utvalde ungdommane skape merksemd om Hallingdal som bu- og arbeidsregion.

Her er ambassadørane som Regionrådet for Hallingdal presenterte for Hallingtinget tysdag. Dei neste to åra skal desse 12 ungdommane vera særskilde ambassadørar for Hallingdal:

Selma Øen Li

Taekwondo-utøvar frå Ål, fødd i 2000.

Er på taekwondo-landslaget, med svart belte 1. Har fem NM-gull og to NM-sølv, fem EM-gull, eitt EM-sølv og ei EM-bronse. Samt ei World Cup-bronse, eitt VM-gull, eitt VM-sølv og to VM-bronse. Kombinerer sporten med å vera elev ved Gol vidaregåande skule. Har ambisjonar om å bli best i verda som senior. Ho er mykje ute og reiser og seier ho blir meir og meir klar over kor godt det er å koma heim til Hallingdal; «ein fantastisk stad å vekse opp».

Sondre Juven

Friidrettsutøvar frå Nesbyen, fødd i 1999.

Han spring 800 og 1500 meter og er ein av dei ti beste i Europa på 1500 meter. Har delteke i to europameisterskap, U18 og U20. Kombinerer idretten med å vera elev ved Gol vidaregåande skule. Han er aktiv i lokalsamfunnet og bidreg til rekruttering i friidrettsmiljøet i Hallingdal.

Silje Risdal Liahagen

Dansar, songar og skodespelar frå Ål, fødd i 1991.

Ho lever som frilansdansar, – songar og -skodespelar, både gjennom instruksjon og som utøvar på scena. Ho bur i Oslo og vart uteksaminert frå Bårdar Akademiet i Oslo våren 2014. Silje er i A-klassa (eliteklassa) på Landskappleiken, i både vokal og dans.

Tomas Markegård

Alpinist frå Hemsedal, fødd i 1995.

Han har fullført NTG på Geilo og bur no i Oslo. Han fekk plass på høgskulelaget på Lillehammer (skilag i regi av Norges Skiforbund) og er på europacup-landslaget i alpint, og satsar for fullt for å nå verdstoppen. Han reiser mykje til mange store skidestinasjonar rundt om i Europa, men meiner det framleis er best å køyre på ski i Hallingdal.

Nina Helene Aas Røkkum

Samfunnsengasjert musikar og idrettsutøvar frå Flå, fødd i 1991.

Bur i Trondheim og jobbar som stipendiat ved Institutt for sosialt arbeid på NTNU. Engasjert i universitetspolitikk og vart nyleg valt som representant for mellombelse vitskapelege tilsette i NTNUs styre. Har studert på NTNU og fullført ein mastergrad i sosiologi. Ho har spelt fotball for Hallingdal Fotballklubb, og spelar no innebandy i 1. divisjon for NTNUI. Sit i forum for Sportsleg Langsiktig Utvikling (SLU), er sertifisert innebandytrenar. Trenar barn og andre aldersgrupper i regi av Norges Bandyforbund, avdeling Midt-Norge. Ho er også sertifisert instruktør og jobbar på treningssentera til Sit Idrett.

Song er ein stor lidenskap og ho har delteke på UKM i ei årrekkje og har seinare vore dommar. Ho er ein viktig bidragsytar til 17. mai-revyen på Flå. Syng mykje i bryllaup, gravferder og konfirmasjonar. Har sidan 2005 sunge jula inn i Flå kirke. Var engasjert i MOT i Flå.

Filip Fjeld Andersen

Utøvar i langrenn og skiskyting, frå Geilo, fødd i 1999.

Er på juniorlandslaget i langrenn. Går siste året på NTG Geilo. Seier sjølv at det er viktig å kunne gi noko tilbake til idretten og vera eit godt førebilete for dei yngre slik han sjølv har opplevd.

Mikkel Brusletto Kaupang

Freeskiutøvar frå Geilo, fødd i 1999.

Kan skilte med 3.-plass i NM i 2017 i ei litt ny konkurransegrein. Går siste året på NTG Geilo og satsar på å koma seg ut i verda neste år for å vise kva han er god for.

Eirik Fuglesteg Luksengard

Lausdansar frå Ål, fødd i 1992.

Begynte å danse hjå Martin Myhr og Gunnlaug Lien Myhr på Torpo i 8. klasse. Elev ved Frikar-akademiet 2008–2010 og har seinare turnert med Frikar-forestillingane «The Snuff Grinders», «KRUK», og med Alexsander Rybak. Dei siste åra har han dansa i dansekompaniet Kartellet, blant anna i forestillingane «Anføttes» og «Doppler». Sistnemnde fekk kritikarprisen i dans i 2016. Utdanna lærar.

Emil Intelhus Brøto

Langrennsløpar frå Gol, fødd 1998.

Har fullført NTG Geilo og bur nå på Lillehammer. Satsar på langrenn og kombinerer idrett med eigedomsmeklar-studium på deltid. Har ein 6.-plass i NM senior lagsprint, 13.-plass i NM jr., 7.-plass frå norgescupen og fleire kretsmeisterskap-titlar. Går for Gol IL og er ein del av Team Hallingdal.

Monika Engeseth

Musikar frå Nesbyen/Gol, fødd i 1997.

Studerer lyd og musikkproduksjon ved Noroff fagskole i Bergen. Produserer og skriv songar, syng og spelar gitar. Har spelt rundt omkring med bandet Maintime, ho har spelt med Darling West og delteke på hallingjazz i fleire år. Vann Drømmestipendet i 2016, og heldt i august sin fyrste konsert i Bergen med sitt nyaste prosjekt «Moyka».

Trym Halbjørhus

Langrennsløpar frå Hemsedal, fødd i 1996.

Han går for Team Hallingdal, og bur både i Hemsedal og på Lillehammer. Han bestemte seg for å satse på ski som 17-åring. Han er allsidig og går no inn i det andre årets sitt som seniorløpar. Det er tøft, men han er klar for å ta eit godt steg vidare i vinter.

Åsne Børtnes

Musikar, dansar og idrettsutøvar frå Gol, fødd i 1999.

Ei svært allsidig jente som driv med musikk (song, gitar, piano, ukulele), dans (hiphop, jazz, house) og fotball. Ho har tidlegare drive med langrenn, alpint/jibbing, folkedans og turn. Ved sida av å gå på idrettslinja på Gol vidaregåande skule, jobbar ho på IFO og som turn-, fotball- og jibbetrenar.