Helsa sommartoget velkomen
Det er liv og røre på Ål stasjon i dag.
Det var folksamt på Ål stasjon rett før NRK sitt sommartog kom inn på perrongen klokka 12.25 tysdag.
– Me må jo møte opp for å sjå kva dette er, smiler Merete Sjemmedal.
Artikkelen held fram under annonsen.
Saman med borna Gabriel, Mikael og Melissa Sjemmedal ventar dei spent. Dei er på plass for å sjå toget rulle inn på stasjonen og for å sjå innslaga frå scena.
– Kult at toget stoppar her i Ål, seier Gabriel.
Dei skal benke seg framfor Tv-skjermen og sjå sendinga i kveld.
– Me kjem nok ikkje i kveld for det blir for seint for ungane, seier Merete.
- Hurra!
Mathis Stavn Ihle viftar med flagget der han sit høgt oppå skuldra til Ann Rigmor Stavn.
– No kjem toget! ropar han.
Høgt oppe i lufta sirklar eit helikopter. Det heile skal dokumenterast, minutt for minutt. Tonane frå hardingfela til Helga Myhr har så vidt stilna frå scena i det me høyrer toget tute.
Mathis jublar når toget tøffar inn på stasjonen.
Artikkelen held fram under annonsen.
– Hurra!
Mjølking og klatring
Programleiarane Nadia Hasnaoui og Martin Giæver står i togvindauget og vinkar. Dei blir møtt av eit folkehav på perrongen.
– Det er utruleg moro å sjå så mykje folk, smiler Giæver.
Planen for dagen er klar.
– Eg skal ein tur i klatreparken og Nadia skal mjølke ei geit, seier han.
– Akkurat den mjølkinga er eg veldig spent på, ler Nadia Hasnaoui.
Besøket på Ål blir den første sendinga for programleiarparet.
– Me skal mellom anna helse på skigutane Øystein Bråten og Robert Andre Ruud og Tove Bøygard kjem, fortel dei før dei forsvinn inn i folkemengda.
