– Glitre er ueigna for ambulansane
Dei misnøgde ambulansearbeidarane i Gol har full støtte hjå sjefane i Vestre Viken HF.
– Eg skjønar at frustrasjonen er stor, seier Ove Treverket. Han er distriktsleiar for ambulansetenesta i Hallingdal og Ringerike.
Han seier at Vestre Viken HF heile tida har sagt at dei ønskjer ei samlokalisering med legekontoret, slik det er i dei andre kommunane i dalen.
Artikkelen held fram under annonsen.
Blålys gjennom sentrum
Tomtevalet er gjort av omsyn til trafikktryggleik, heiter det i vedtaket til formannskapet.
– Her har dei bomma, seier Treverket og slår i bordet med fakta.
Ambulansetenesta i Gol har 1100 utrykkingar i året – av dei er det 300 akuttutrykkingar. Kring halvparten av akuttoppdraga inneber å hente akutt sjuke på legekontoret og transportere dei til sjukehusa på Ringerike og i Drammen.
Ifølgje Treverket vil plasseringa på Glitre føre til at ambulansen får mange hasteoppdrag med blålys og sirener gjennom sentrum.
Han meiner at både faglege argument og omsynet til trafikktryggleiken peikar mot at ambulansesentralen skulle vore plassert i sentrum nær legekontoret.
Har sagt klart ifrå
Bjørn Hammer er ambulansesjef i Vestre Viken HF. Han har vore på synfaring både på den midlertidige stasjonen på Herad og sett på dei ulike tomtealternativa for eit nybygg. Han seier at synspunkta frå Vestre Viken HF er tydeleg formidla til kommuneleiinga.
– Kommunehelsetenesta er den viktigaste samarbeidspartnaren vår, og vårt klare ønske er å vere samlokalisert med legekontora, slik det er i dei andre kommunane. Dette har me formidla både til rådmannen og politikarane, seier han.
Hastar å finne ei løysing
Ifølgje Hammer hastar det med å finne ei løysing, men han kan ikkje gje noko klart svar på kva som vil skje vidare.
Artikkelen held fram under annonsen.
– Dei tilsette trugar med å søkje seg vekk frå Gol. Korleis vurderer du den situasjonen?
– Ambulansesentralen på Gol kan ikkje brukast, og me har plikt til å ha ein stasjon med tilfredsstillande standard. Ambulansetenesta ønskjer primært å leige, og eg vurderer det som lite sannsynleg at me kjem til å byggje noko sjølv. Men dette er noko me må ta opp med eigedomsavdelinga. Det hastar med å få til ei ny løysing, seier han.
