Gjer alt for abonnentane

Hallingdølen har arbeidd heile veka for å løyse distribusjonsproblema som oppstod forrige laurdag.

Etter at Posten ikkje lenger har ansvaret for laurdagsomberinga av avisene, skulle 700 av Hallingdølens abonnentar for fyrste gong få avisa levert av Kvikkas/Norpost.

Det gjekk ikkje etter planen. Utan lokalkjende avisbod var det mange som ikkje fekk laurdagsavisa til rett tid.

Beklagar

– Me beklagar det sterkt. Me gjer alt me kan for å ordne dette, seier adm. direktør i Hallingdølen, Ola Stave, til abonnentane som ikkje fekk avisa.

Han har saman med marknadssjef Rolf Sveinhaug arbeidd heile veka for å løyse problema. Begge seier situasjonen for Hallingdølen, og for Avis-Norge elles, er alvorleg. For Hallingdølen var problema store særleg i Flå og Nore og Uvdal. Difor blir det no lagt ut depot med aviser i daglegvarebutikkar i Flå, Rødberg og Uvdal kor abonnentar kan hente aviser. I Skurdalen og Dagali var det også problem med distribusjonen for ei veke sidan. Dei problema skal vere løyst ved at Hallingdølens eige avisbod frå no skal levere aviser her.

Spente

Det var særleg i Nore og Uvdal Hallingdølens abonnentar ikkje fekk avisa.

Det heng også saman med mangelen på vegnamn og husnummer.

– Når avisboda då ikkje er lokalkjende, er det vanskeleg å finne fram, seier Sveinhaug.

– Me oppmodar alle til å merke postkassene sine, seier Stave.

Dei er spente på om det nye distribusjonsselskapet klarar å levere varene i morgon.

– Me håpar Kvikkas/Norpost kan levere tilnærma 100 prosent, seier Stave, og minner om at avisa også er tilgjengeleg på hallingdolen.no.

Hallingdølen vil gjerne ha tilbakemelding viss du som abonnent ikkje får laurdagsavisa. Du kan sende epost til postmottak@hallingdolen.no eller ringe 909 69 606.