Fusjon skal sikre lokalt engasjement
Sparebank 1 Hallingdal og Øystre Slidre Sparebank blir éin bank 23. november.
Namnet blir Sparebank 1 Hallingdal Valdres. Adm. banksjef Knut Oscar Fleten seier fusjonen gjer det mogeleg å vidareføre sparebankverksemda med lokal forankring. «Målet er å sikre eit godt banktilbod i Hallingdal og Valdres, og samstundes skapa ein regional bank med god konkurransekraft, lønsemd og evne til å bidra i utviklinga av lokalsamfunna», heiter det i ei pressemelding.
I samband med fusjonen blir det også oppretta to stiftingar, Sparebankstiftelsen Hallingdal og Sparebankstiftelsen Øystre Slidre. Ved sine fordelingar skal dei ta omsyn til distrikta som har bygd opp kapitalen i Sparebank 1 Hallingdal og Øystre Slidre Sparebank.
Artikkelen held fram under annonsen.
Den nye bankorganisasjonen vil få sju avdelingskontor. Desse ligg på Geilo, Ål, Gol, Hemsedal, Fagernes, Heggenes og Beitostølen. Alle tilsette får behalde jobben.
