- Ein må vege dyrevelferd på kort og lang sikt opp mot kvarandre

Landbruksministeren står framleis fast ved 1. mai 2018 som tidsfrist for når Nordfjella-reinen skal vera fjerna. – Men eg veit at dette vil krevje kompromiss, seier han.

Måndag møtte landbruks- og matminister Jon Georg Dale (Frp) ordførarar frå kommunane som grensar til Nordfjella. Tema for møtet var status etter den ordinære reinsjakta, og arbeidet framover. Ordførarane har i lengre tid jobba for å få til dette møte, for å såleis å kunne leggje fram ein alternativ framdriftsplan for saneringa av Nordfjella-reinen.  

– Eg er opptatt av god dialog med alle partane som er involverte i saneringa av Nordfjella-reinen. Det opplever eg at me har. Spesielt oppfølging etter gjennomført sanering krev involvering av kommunane, seier Dale til Hallingdølen.

Står fast ved tidsramma

Ordførarane tok til orde for å bruke eit ekstra år på å sanere Nordfjella-reinen. Slik kan ein få eit så effektivt uttak som mogleg samstundes som dyra ikkje lir.  Men 1. mai 2018 blir framleis ståande som frist for når Nordfjella-reinen skal vera fjerna.

– No har me tatt kring 25.000 prøver av ulike viltbestandar dei to siste åra. Den einaste plassen me veit at det finst CWD er i Nordfjella. For å hindre smittespreiing meiner eg det er grunn til å halde oppe trykket innanfor den tidsplanen som er lagt, seier Dale. 

Dyrevelferd på kort og lang sikt

– Tidsramma er altså framleis låst til 1. mai 2018, trass klare råd om forlenging frå fleire hald?

– Det er ikkje frå fleire hald. Frå kommunane blir det tatt til orde for noko lenger tidsfrist. Frå fagmyndigheitene som har størst kompetanse på å hindre smittespreiing, blir det gitt tydelege råd om å halde seg til planen. 

– I ei bekymringsmelding varslar Bjørnar Ytrehus og Olav Strand, at dyrevelferda er dårleg for Nordfjella-reinen. Ei melding som Mattilsynet har avvist. Kjenner du til dette?

– Eg er orientert om det. Mattilsynet er dei som har kompetanse til å vurdere alle konkrete meldingar, så eg har ikkje gått meir inn i det. Eg er opptatt av at me sikrar god dyrevelferd for dyra, men utfordringa er at smitta i verste fall kan spreie seg. Sjukdomen er alltid dødeleg, noko som medfører dårleg velferd for dei dyra som får sjukdomen. Ein må vera budd på at ein må vege dyrevelferd på kort og lang sikt opp mot kvarandre. Det verste som kan skje er at dette spreier seg til nye område. Difor må me handtere situasjonen effektivt. 

Mattilsynet sitt ansvar

«Når me har forlenga jakta med ein månad og påverkar dyra gjennom felling, vil dette sjølvsagt medføre auka aktivitet hjå reinen.» og «Dyra som er felt no i oktober har, ifølgje jegerane eg har prata med, vore i godt hald.», heiter det mellom anna i ein rapport frå SNO om dyrevelferda for Nordfjella-reinen. Rapporten er skriven av seniorrådgjevar i SNO og operativ leiar for det statlege fellingslaget, Petter Braaten. Det er denne rapporten Mattilsynet har lagt vekt når dei avviser bekymringsmeldinga til Bjørnar Ytrehus og Olav Strand. 

– Er det ikkje oppsiktsvekkjande at Mattilsynet legg meir vekt på rapporten frå SNO enn eit klart varsel frå villreinforskarane Ytrehus og Strand?

– Det er Mattilsynet som har kompetanse til å gjera desse vurderingane. Det er ikkje underlagt politisk kontroll. Eg stolar på at Mattilsynet gjer gode vurderingar på dette. Eg er opptatt av at ein varetek god dyrevelferd så langt som råd, men det er heller ikkje bra for dyrevelferda om ein får auka smittepress. Eg veit at dette vil krevje kompromiss, seier Dale.