– Ei elv av gjørme gjennom tunet
Eitt hus i Bøygardsvegen og eitt hus i Liagardane blir evakuert på grunn av skredfare natt til torsdag.
Det får Hallingdølen opplyst av operasjonsleiar Beate Sem i politiet klokka 22.30 onsdag kveld. To geologar har vurdert skredfaren i to skredområde i Ål. I Bøygardsvegen var fire husstandar evakuert tidlegare på kvelden.
– Det har blitt kaldare i lufta utover kvelden. Snøsmeltinga minkar og situasjonen har stabilisert seg. Eitt av husa i Bøygardsvegen blir evakuert i natt, men ekspertane vurderer det som trygt for dei tre andre. Dei får lov til å flytte heim for natta. Det vil bli tatt ei ny vurdering torsdag morgon, seier Sem.
Artikkelen held fram under annonsen.
– Det skjedde så fort
I det andre skredområdet vart det tidleg klart at politiet ville følgje tilrådinga om å evakuere eitt av husa i nedre del av Liagardane. Stein Ola Tormodsgard bur lenger oppe i Liagardane. I ettermiddag fekk han sjå katastrofen på nært hald då gjørmevatnet kom fossande litt før klokka 16. Det første han merka var at bakken ovanfor huset hadde skifta farge og blitt mørkare.
– Det skjedde så fort. Plutseleg fossa det gjørme forbi inngangsdøra på kårhuset og gjennom tunet. Heldigvis bur det ingen i dette huset, seier han.
– Dette er eit anna skred
Tormodsgard sette seg i bilen og fekk rygga ut av gjørma og ut på tørt land. Deretter ringde han etter hjelp.
– Det stod om minutt og sekund før bilen hadde blitt tatt. I det eg sette bilen i revers, kom gjørma rundt hushjørnet, fortel han. Då han kom gjennom til nødsentralen, trudde dei han ringde for å varsle om skredet ved Bøygard.
– Eg måtte forklare at dette var eit nytt skred, seier han.
Berga vegen med traktor og spade
I mellomtida hadde Steinar Tormodsgard, far hans, køyrde traktoren ut av tunet og sett traktorskuffa på tvers av vegen. På den måten greidde han å føre gjørmevatnet vekk frå Liagardsvegen og ned på jordet nedanfor garden. Etterpå vart han ståande i tre kvarter og spa gjørme.
– Eg er glad far min er så snarrådig. Nedre del av Liagardane vart berga av traktoskuffa og spaden til far min. Hadde dette fått fritt leide nedover, ville alle stikkrenner blitt tetta og trøbbelet ville forplanta seg, seier Stein Ola Tormodsgard.
Får ikkje sove uansett
Då Hallingdølen var oppom ved 18–19-tida, var vassmengdene sakte i ferd med å minke. Det skuldast at ei gravemaskin var i arbeid lenger oppe i lia. På eit jorde nedanfor Nedre Medgard laga dei nytt bekkeløp.
Artikkelen held fram under annonsen.
– Ein føler seg hjelpelaus når naturkreftene set inn. Eg er glad eg bur i eit land der det er eit system for å handtere slike ting. Det har vore eit renn av folk frå brannvesen, politi, kommune og folk med anleggsmaskiner. Me har fått profesjonell hjelp. Og så er det mange som har vore innom for å prate. Å prate gir god ventilasjon etter ei slik hending, seier han.
– Garden din blir ikkje evakuert. Korleis blir det å gå til sengs etter ein slik dag?
– Her driv me med lemming. Søvn blir det ikkje snakk om uansett. I kveld er kanskje det like greitt, seier Tormodsgard.
