Dette er oppgåvene til dei nye fylka

Den endelege saka om kva oppgåver fylka skal få etter regionreforma, blir først lagt fram for stortinget seinare i haust. Men i avtalen mellom KrF og dei tre regjeringspartia, har dei letta litt på sløret.

* Nordområda: Finnmark og Troms skal få eit større ansvar og ei meir sentral rolle i utforming og gjennomføring av nordområdepolitikken.

* Integrering: Integrerings- og mangfoldsdirektoratet (Imdi) skal halde fram som nasjonalt kompetansesenter på integrering, men fleire av oppgåvene blir overført til fylka, særleg ansvaret for å kvalifisere innvandrarar til å møte regionale arbeidsmarknadsbehov.

* Kompetanse Norge skal haldast oppe som direktorat, men fleire oppgåver blir overført til regionalt folkevald nivå.

* Deler av verkemiddelapparatet til Innovasjon Norge blir overført til fylka.

* Alle oppgåvene i dei noverande fylkesmannsembeta innanfor artsforvaltning (bortsett frå truga artar og verneområdeforvaltning) blir overført til fylkeskommunen.

* Administrasjonen av fylkesvegnettet blir overført frå Statens vegvesen til fylka (alt vedtatt av Stortinget).

* Fylkeskommunen blir styrka som næringspolitisk aktør. Det skal flyttast oppgåver frå SIVA til dei nye fylka.

* Folkehelse: Fylkesmannens oppgåver for folkehelse skal overførast til fylka. Men fylkesmannen skal framleis ha tilsynsoppgåvene.

* Infrastruktur: Tilskot til skredsikring av fylkesvegar blir fylka sitt ansvar. Tilskot til ikkje-statlege flyplassar blir overført frå stat til fylke. Det same gjeld innkjøp av innanlandske flyruter; utvikling av fiskehamner; støtteordninga for breibandutbygging; drosjeløyveordninga.

* Forvaltning av utgreiings- og tilretteleggingsvedtak, samt ansvar for kystskogbruk og satsing på «økologiske føregangsfylke», skal overførast frå Fylkesmannen til fylka.

* Naturvernoppgåver skal overførast frå staten til fylka, blant anna vern av matjord, nasjonale kulturminne.

* Dagens regionale kulturminneforvaltning vil få tilført fleire oppgåver som i dag sorterer under Riksantikvaren.

* Avtalen tek sikte på å innlemme dei regionale utviklingsmidla heilt eller delvis i inntektssystemet frå 2020.

* Den statlege tilskotsordninga for utvida TT-tilbod skal leggjast inn i ramma til fylkeskommunen, men ikkje før ordninga er blitt finansiert som nasjonal ordning.

Dette skal greiast ut:

* Det er varsla eit større fylkeskommunalt ansvar for kulturoppgåver, men det er ikkje tatt stilling til kva for institusjonar som i dag er statleg finansiert, som skal overførast til fylka.

* Ei eventuell flytting av Bufetat og ansvaret for barnevernstenester vil bli tatt endeleg stilling til seinare.

* Ordninga med regionale forskingsfond skal greiast ut med sikte på at fylka skal overta ansvar og finansiering for dette.

* Av avtalen går det ikkje fram om regionreforma på sikt skal gi stordriftsfordelar i form av meir effektiv ressursbruk. Men fylka skal sikrast tilstrekkeleg finansiering til å handtere samanslåingsprosessen.