Bygdefolk samarbeider om ny hyttegrend
Familiebedrifta Uvdalsfjell AS satsar på å utvikle fritidseigedomar og går inn med seks millionar i infrastruktur i eit nytt område med utsikt til åtte fjell.
Selskapet vart oppretta i februar. Målet er å utvikle både fritidstomter og bustader i Nore og Uvdal og legge dei ut for sal. No er dei i gang med Tiurleiken hyttegrend på Hallandsfjell i Uvdal.
Uoppdaga område
Like før påske vart 21 tomter i hyttegrenda lagt ut til sals. På under ei veke var alt to av dei selde.
Artikkelen held fram under annonsen.
– Det passar bra at mange er ute etter hytte eller tomt i desse tider. Hallandsfjell er eit litt uoppdaga område, men fort å bli glad i. Her er det romsleg og ikkje mykje tomter elles. Så ein slepp å stå i kø, seier Liv Brynhild Enerstvedt (35), dagleg leiar for Uvdalsfjell AS.
Samarbeid med grunneigar
Uvdalsfjell AS har kjøpt fire av tomtene frå grunneigar Halvard Halland, og har opsjon på dei resterande. Selskapet har gått inn med seks millionar kroner for å få på plass infrastrukturen. Planen er at straum, fiber, avløp og vegar skal stå klart i løpet av hausten.
– Det er dyrt å utvikle eit hyttefelt. På same tid vil jo ingen lenger kjøpe hytte utan at infrastrukturen er i orden. Samarbeidet med Halland har gjort det mogleg. Han har med seg sonen Knut Olav og barnebarnet Tomas, som gjer ein solid jobb og samarbeider om utviklinga av feltet, fortel ho.
Tett på naturen
Dei tre generasjonane Halland starta å jobbe med å utvikle infrastruktur alt før snøen tok til å smelte. I tillegg skal Halland stå for vedlikehald og brøyting av vegen.
– Det er viktig for oss som utbyggar å legge att minst mogleg spor og sår, for å bevare naturen. Halland kjenner området godt og har gode løysingar for å få det til, seier Enerstvedt.
Hyttegrenda skal ha torvtak, oppdelte vindauge og naturfarger. Dei har rike tradisjonar å spele vidare på, for Numedal er jo og kalla Mellomalderdalen, og få plassar finn du like mange freda bygg som i Nore og Uvdal.
Lokal verdiskaping
Uvdalsfjell AS vektlegg både lokale byggetradisjonar, kortreise materiale og lokale handverkarar.
– Målet vårt er størst mogleg lokal verdiskaping. Sjølv om me i hovudsak satsar på tomter, ønskjer me å legge til rette for samarbeid med lokale handverkarar og entreprenørar. Me har jo kontaktar lokalt og ønskjer rett å slett å vera ei brikke i spelet frå tomt til nøkkelferdig hytte, sjølv om ikkje me skal stå for sjølve bygginga, fortel ho og legg til:
Artikkelen held fram under annonsen.
– For me bygdefolk må jo også ha til salt i maten, seier Enerstvedt lurt.
Då det er både stort trykk på laftekasser og handverkarar i kommunen i desse tider, tek ho difor høgde for at det er avhengig av kapasitet og kva som er ledig.
Skiløype som er tilknytt løypenettet i Åsbøseterdalen, går også tvers gjennom grenda.
– Naturen er fantastisk og innbyr til både jakt og friluftsliv. Å få vera med å oppfylle hyttedraumane til folk i eit slik område er spennande, seier Enerstvedt.