Borna ser brannar og drap - det er forferdeleg

Den politiske uroa i Kenya skaper utfordrande arbeidsforhold i Nairobi for Marit B. Kolstadbråten og Deaf Aid.

Den siste tida har det vore mykje uro i Kenya. Resultatet etter presidentvalet i august vart oppheva av høgsterett, og torsdag sist veke var det nyval. Slumområda i hovudstaden Nairobi har vore prega av opptøyar der etniske grupperingar, som støttar kvar si politiske side, kjempar mot kvarandre. Rundt ein million menneske er stua inn på 2,5 kvadratkilometer i Kibera, den største slummen i Aust-Afrika. Midt oppe i dette bur fleire av borna som organisasjonen Deaf Aid hjelper.

– Sidan borna er døve skjønar dei ikkje kva som skjer. Dei ser brannar og folk som blir drepne, det er ein forferdeleg situasjon, forklarar Marit B. Kolstadbråten.

Svoltne i slummen

For få dagar sidan kom ho til Nairobi, ein by som har stoppa heilt opp. Folk er ikkje på kontora sine, og skulane er stengde.

– Borna som Deaf Aid hjelper til dagleg må no vere heime i to månader. Skulane opnar ikkje før i januar, fortel ho.

Mange av borna går svoltne i slummen. Foreldra har reist ut av byen for å tene pengar.

– Me skulle ønskje me hadde pengar nok til å ta dei inn på ein leir, seier Kolstadbråten.

Trøytte og leie

Ho reknar med at Deaf Aid har mista tre til fire månader med arbeid grunna uroa i landet. Onsdag var første dagen med normal trafikk i gatene etter nyvalet.

– Men folk er veldig avventande til kva opposisjonen, med Raila Odinga i spissen, vil setje i verk no.

Valdeltakinga sist veke var på rekordlåge 38 prosent.

– Folk er trøytte og leie. Dei er leie av å miste inntektene sine og vil gå vidare med liva sine. Det syner valdeltakinga, seier Kolstadbråten.